MF sei submete proposta alterasaun Lei Tributária no Impostu ba PN
DILI, 24 Juñu 2025 (TATOLI) – Ministériu Finansa (MF) sei submete proposta alterasaun Lei Tributária no Impostu ba Parlamentu Nasionál (PN).
Vise-Ministra Finansa, Felícia Claudinanda Cruz, hateten atu aumenta reseita no fonte alternativa hodi hasa’e reseita ka hakotu dependénsia ba Fundu Mina-rai mak daudaun Governu halo hela reforma jestaun finansa públika, liuhusi revizaun dahuluk ba Lei Tributária ho espande baze tributasaun no aprova Lei Impostu kona-ba valór akresentadu.
Governante ne’e hateten Fundu Mina-rai finansia kuaze 70% to’o 80% husi despeza Governu.
“Ita-nia ekonomia ne’e depende ba gastu Governu nian, mezmu ida-ne’e ita dudu reseita doméstika ne’ebé agora reprezenta 13% husi PIB [Produtu Internu Brutu], maibé iha limitasaun atu hasa’e impostu sira tanba sei fó impaktu negativu ekonomia no sosiál”, nia esplika.
Tuir nia, dalan úniku mak halo rasionalizasaun ba despeza ne’ebé Ministériu Finansa halo hela no sei kontinua, liuliu ba disiplina fiskál ba iha despeza nian.
Aleinde ne’e, kontinua investe iha setór produtivu sira hodi hadi’a problema estruturál sira hanesan kestaun títulu ba rai, asesu finanseiru hanesan atu dezenvolve ka loke banku dezenvolvimentu nasionál no iha mós hanoin fonte finanseiru seluk, maibé sei tetu didi’ak antes foti desizaun ruma.
Governante ne’e apresia ba Komisaun C ne’ebé trata Asuntu Finansa Públika nia relatóriu no pareser ba análize ba ezekusaun orsamentál trimestre dahuluk 2025 hodi tau atensaun.
Notísia relevante: PN halo apresiasaun ba relatóriu ezekusaun orsamentál trimestre dahuluk 2025
Jornalista: Nelson de Sousa
Editora: Maria Auxiliadora
