DILI, 24 Juñu 2025 (TATOLI)—Diretór Jerál Desportu Ministériu Juventude Desportu Arte no Kultura (MJDAK), João Rodrigues, informa daudaun ne’e Ótel hamutuk ualu (8) konfirmadu ona fasilita atleta no delegasaun nasaun hitu (7) no delegasaun Timor-Leste nian, durante partisipa jogu Komunidade Nasaun Sira Ko’alia Lian Portugés (CPLP, sigla portugés) iha Timor-Leste.
Notísia Relevante: Voluntáriu 200 tuir formasaun atu atende jogu CPLP
Nia hatutan, partisipante ba jogu CPLP iha tinan ida-ne’e, to’o agora ne’e delegasaun husi Brazíl mak seidauk konfirmadu atu partisipa no iha posibilidade Brazíl sei la tuir kompetisaun jogu CPLP ba da-12 iha Timor-Leste ne’e ne’ebé sei realiza iha 17-27 Jullu 2025.
“Ótel sira-ne’e prontu hotu ona. Guine Bissau mak sira-nia ekipa 14 jullu to’o ona Timor-Leste. Sira balun seluk ne’e sei to’o 15-16 Jullu no ita preparadu atu simu sira,” João hateten ba voluntariu sira iha Salaun Ministeriu Solidariedade Sosiál no Inkluzaun (MSSI), kaikoli, tersa ne’e.
Ótel sira-ne’ebé preparadu mak hanesan Golgota Hotel sei akomula delegasaun husi Angola hamutuk 110, Novu Turizmu sei akomula delegasaun husi Cabo Verde hamutuk 94, Excelilor Resto Hotel sei akomula delegasaun husi Guiné Bissau hamutuk 16.
The Beach Graden/The Plaza Hotel sei akomula delegasaun husi Guiné Equatorial hamutuk 16, Exelilor Resto Hotel sei akomula delegaaun husi Mosambike hamutuk 38, Hotel Timor sei akomula delegasaun husi Portugál hamutuk 106, The Beach Graden/The Plaza Hotel sei akomula delegasaun husi São Tome e Principe hamutuk 35 no delegasaun Timor-Leste hamutuk 117 ne’e sei hela iha Hotel Ramelau.
Nune’e, delegasaun sira-ne’e ninia númeru provizóriu ba atleta sira-ne’ebé atu partisipa iha jogu CPLP ne’e hamutuk 535.
Notísia Relevante: Timor-Leste nia preparativu ba jogu CPLP iha faze importante tolu
Jornalista : Hortencio Sanchez
Editór : Cancio Ximenes
