Prosesu konstrusaun politékniku Betanu iha faze konkursu

DILI, 24 Juñu 2025 (TATOLI)-Ministériu Ensinu Superiór Siénsia no Kultura (MESSK), José Honório da Costa Pereira Jerónimo, hatete daudaun ne’e konstrusaun segunda faze ba politékniku Betanu iha prosesu konkursu.

Nia dehan semana rua liuba Konsellu Ministru halo ona deliberasaun, prosesu tama ona ba Konsellu Administrasaun husi Fundu Infraestrutura (KAFI), no haruka ona ba Komisaun Nasionál ba Aprovizionamentu (CNA, sigla portugés) hodi tama ba konkursu no prosesu konstrusaun nian.

“Ita tau ona osan atu hadi’a, tanba sira oferese sala hitu iha ne’ebá, ita sei hadi’a hotu, ita sei hahú ho simu estudante foun, depois iha tinan 2026-2027 bele tama ona faze konstrusaun ba politékniku otelária Lautein”, ministru dehan ba TATOLI iha ninia knaar fatin Kolmera.

Nia dehan orsamentu ba konstrusaun ne’e miliaun $16.475. Tanba, Institutu Politékniku Betanu daudaun ne’e iha kursu rua hanesan saúde animál no enjeñaria.

Governante ne’e afirma, faze konstrusaun ba politékniku rua, peska no mariña, enjenária hein prosesu tuir mai.

“Ida-ne’e planu governu nian ne’ebé tau ona iha Planu Estratejia Dezenvolvimentu (PED) 2011-2030, nune’e IX governu hahú halo, to’o mandatu remata la halo hotu, governu foun mai tenke kontinua halo, tanba ida ne’e ita hakarak tau ona politékniku sira iha munisípiu atu mobilidade estudante labele mai hotu iha Dili, maibé prepara sira ne’ebé tékniku profesionál sira tenke ba ona politekniku”, nia realsa.

Notísia relevante: Konstrusaun Institutu Politékniku Betanu hein aprovasaun husi KM

Jornalista       : Osória Marques

Editora           : Rita Almeida