DILI, 02 Maiu 2025 (TATOLI)–Ministru Ensinu Superiór, Siénsia no Kultura (MESSK), José Honório da Costa Pereira, informa Konsellu Administrasaun husi Fundu Infraestrutura (KAFI) aprova ona orsamentu ba konstrusaun Institutu Politékniku Betanu, falta de’it mak aprovasaun husi Konsellu Ministru (KM).
Ba jornalista TATOLI iha ninia servisu fatin Kolmera, sesta-ne’e, nia dehan bainhira KM halo ona aprovasaun mak sei loke prosesu konkursu públiku, tanba osan ne’ebé aprova rihun $16 resin.
Konstrusaun sei akontese iha rai ektare-13 hodi halo andar rua ne’ebé konstrui ba saladeaula ne’ebé kompleta ho dormitóriu ba estudante sira.
Konaba prosesu konstrusaun iha Lautein, haree liubá otél no turizmu akadémia nian. Iha Manatutu sai hanesan akadémia peska no estudu mariñu. Betanu haree liu-ba produsaun animál no kontrusaun sivíl.
Polítika governu atu aumenta politéknika iha fatin hirak ne’e ho objetivu minimiza konsentrasaun númeru estudante iha kapitál Dili.
Prosesu harii politékniku turizmu iha Lautein, nia dehan dokumentu kona-ba rai prontu ona, hein dezeñu no BoQ.
“Kona-ba ida-ne’e tinan kotuk ita haruka ona estudante 10 hasai kursu mestradu iha Tailándia para iha ne’ebá no ita-nia profesór na’in 10 mós iha ne’e atu hanorin, ami prepara hela, parte kurikulu sei diskute hela no ami mós husu hela Fundu Infraestrutura karik iha osan tulun uituan halo reabilitasaun saladeaula hitu iha Lautein”, nia dehan.
Nia hatutan tan: “Ida-ne’e ha’u presiza ko’alia ho Sekretáriu Estadu Ensinu Sekundáriu no Tékniku Vokasionál, hodi hato’o asuntu ida-ne’e. Hodi rona hanoin ruma hosi sira nune’e bainhira hahú ne’e ho di’ak. Ita konvida enjineiru sira husi Institutu Teknolojia Bandung ne’ebé halo hela dezeñu ho BoQ, ita-nia tékniku haree hela nia prosesu. Ne’ebé kuandu remata ita aprenzenta ba Konsellu Ministru aprova mak bele hahú”.
Prezidenti foun labele politiza instituisaun
Oportunidade ne’e, ministru mós husu ba prezidenti foun IPB, Alcino da Costa Fernandes, atu labele politiza IPB tanba ne’e instituisaun akadémika.
“Iha ha’u-nia intervensaun ha’u hatete kedas instituisaun akadémika sira labele ona iha pensamentu rasismu, rasista la’ós tempu ona atu ko’alia, tenke iha pensamentu hanesan Timor oan”, afirma.
Nia klarifika la impoin ba nomeasaun prezidente foun, tanba konsellu jerál mak haree kritériu tuir estatutu IPB nia no eleisaun ne’e demokrátiku.
“Ha’u hatene katak entidade balun tau kestaun hela ba eleisaun ne’e katak ha’u mak obriga, atu hatete ba sira katak tenke haree instituisaun ne’ebé tutela mai MESSK; UNTL, IPB, ANAAA, INCT, hanesan ministru ha’u nunka tau liman ba sira tenke halo ida-ne’e, halo ida ne’ebá, sira bele haree ANAA, INCT, UNTL, IPB la’o normál”, afirma tan nia.
Eleisaun ba Prezidente foun hala’o ona iha sesta (20/04/2025) semana kotuk. Prosesu ne’e kandidatu na’in-hitu mak eis Ministru Petróleu, Vitor da Conceição, profesór dotouramentu hanorin Brazil, Julião, profesór ida hanorin enjenária, Duarte Sarmento, profesór ida hosi UNTL, Luis Tavares, kandidatu na’in tolu ho nivel mestradu hanesan Pedro, Alcino, Cipriano.
Nia esplika eleisaun ne’e, Alcino ho votu-lima, Julião ho votu-haat, Pedro ho votu-tolu. Haree hosi votu ne’e, Prezidente Konsellu Jerál IPB, Brigida anúnsia katak laiha ida mak manán, entaun kontinua ba ronde daruak ho kandidatu Alcino ho Julião. Ikus Alcino mak manán ho votu hitu no Julião hetan votu-lima.
Notísia relevante: Kandidatu admitidu ba UNTL no IPB iha tinan 2025 hamutuk 5.749
Jornalista : Osória Marques
Editora : Rita Almeida
