DILI, 23 Juñu 2025 (TATOLI)—Prezidente Tribunál Rekursu, Afonso Carmona informa katak to’o agora Tribunál Rekursu seidauk notifika defeza ligadu rekursu kontestasaun ba desizaun Tribunál Judisiál Primeira Instánsia Dili kona-ba kazu matebian Zizelma Verdial Gonçalves nian.
“Kuandu ko’alia kona-ba prosesu, ha’u labele komentáriu, tanba ita halo komentáriu ita hatene ona nia revizaun. Maibé, tuir regra prosesuál sempre notifika ba parte kontrária. Parte kontrária seidauk simu notifikasaun. Signifika katak prosesu sei la’o hela,” Carmona hateten ba jornalista sira iha TJPID, Kaikoli, segunda ne’e.
Nia hatutan, prosesu rekursu kontestasaun ba kazu ne’e, Tribunál Rekursu tenke notifika parte defeza hodibele hatene.
Rekorda fali katak, Defensór Públiku, Eustáquio Guterres nu’udár asistente ba matebian Zizelma Verdiál Gonçavles, hateten nia kontinua hein tanba seidauk hetan notifikasaun husi Tribunál Rekursu.
Eustáquio Guterres haktuir katak, iha loron 14 Abríl liubá, nia submete ona rekursu hodi kontesta desizaun Tribunál Judisiál Primeira Instánsia Díli ne’ebé aplika pena prizaun tinan-tolu suspende ba tinan haat ba arguidu MSC.
Notísia relevante: Asistente ba matebian Zizelma submete ona rekursu hodi kontesta desizaun Tribunál
Nune’e, nia hateten jornalista sira tenke bá husu Tribunál Rekursu ne’ebá ninia despaxu no desizaun iha ona ka lae, maibé daudaun ne’e hanesan asistente ka defeza ba vítima Zizelma seidauk hetan notifikasaun kona-ba rekursu ne’e.
Entretantu, Defeza Eustáquio Guterres submete prosesu rekursu iha loron 14 Abríl liubá hodi kontesta desizaun Tribunál Judisiál Primeira Instánsia Dili tanba la simu desizaun Tribunál Primeira Instánsia nian aplika pena prizaun tinan-tolu suspende ba tinan-haat ne’ebé aplika ba arguidu MSC.
Jornalista: Natalino Costa
Editór: Xisto Freitas da Piedade
