BAUKAU, 25 Juñu 2025 (TATOLI)—Autoridade Administrasaun Munisipál (AAM) Baukau ofisialmente simu ona Planu Munisipál Ordenamentu Territóriu husi Governu liuhusi Ministériu Administrasaun Estatál (MAE).
Sekretáriu Estadu Dezenvolvimentu Lokál (SEDL), Mateus dos Santos Tallo, esplika dokumentu referidu nu’udár instrumentu ba planeamentu hodi fó dalan atu estabelese estratéjia dezenvolvimentu territóriu no polítika munisipál ordenamentu territóriu urbanizmu nian.
“Baukau-oan sira hetan ona Planu Ordenamentu Territóriu. Planu ne’e to’o pontu aprovasaun, tanba rezultadu servisu Baukau-oan rasik mak define orientasaun ba jestaun espasu sira iha territóriu Baukau nian. Tanba ne’e tenke orgullu no sai na’in ba instrumentu ne’e hodi utiliza ho loloos,” Sekretáriu Estadu Dezenvolvimentu Lokál hateten iha Sentru Konvensaun Baukau, kuarta ne’e.
Mateus Tallo esplika katak PMOT sai hanesan forsa legál atu orienta, kontrola ba okupasaun, uzu no transformasaun rai nian husi entidade públika no privada iha nivel munisipál hodi fó orientasaun no koordenasaun ba investimentu públiku nian.
Aleinde ne’e, PMOT hanesan planu estratéjiku ida-ne’ebé sai instrumentu ba kreximentu no jestaun rekursu sira hodi reflete valór aspirasaun husi komunidade iha nivel munisípiu.
“Bainhira ita laiha planu ordenamentu territóriu ne’ebé klaru, sai dezafiu hodi impede fali prosesu dezenvolvimentu iha ita-nia munisípiu rasik,” Mateus Tallo akresenta.
Iha biban hanesan, Prezidente Autoridade Munisípiu (PAM) Baukau, Veneranda Lemos Martins, garante implementasaun PMOT iha Baukau sei hetan apoiu másimu husi entidade sira hanesan liberta liña saudavel iha Baukau hahú ho muda negosiante sira husi okupa espasu públiku ba merkadu Tuanau.
“Ema balun dehan atu mai ordena saida, maibé tenke ordena atu la’o ho loloos, tanba sidade laran kalén, lixu nakonu, animál halai tun-sa’e, buat sira-ne’e hotu tenke ordena ho didi’ak,” Veneranda Lemos argumenta.
Tuir dokumentu iha PMOT define vizaun Munisípiu Baukau mak hanesan sentru ekonómiku no polaridade estruturalmente rejiaun orientál Timor-Leste nian, ne’ebé afirma husi dezenvolvimentu indústria, turizmu, komérsiu no serbisu iha nivel superiór.
Nune’e mós, valoriza no esplora iha tempu ne’ebé hanesan potensiál agríkola rejiaun nian no ninian rekursu naturál, patrimoniál no kulturál sira liuliu iha Baukau Vila.
Entretantu, PMOT estabelese liuhusi Dekretu-lei númeru 35/2021 ne’ebé elabora husi Ministériu Planeamentu Estratéjiku no Dezenvolvimentu no hetan aprovasaun husi Konsellu Ministru iha loron 12 Marsu 2025.
Jornalista: Natalino Belo
Editór: Xisto Freitas da Piedade
