DILI, 25 Juñu 2025 (TATOLI)-Prezidente Asosiasaun Mariñeiru Timor-Leste (AMTL), Simplício Ximenes, prefere governu investe rekursu umanu iha tasi tanba setór mariña ne’e importante tebes ba Timor-Leste.
“Agora daudaun ita investe ona ita-nia ema iha tasi tanba ita hanesan nasaun ida, entaun ita presiza investe ita-nia ema iha tasi”, nia dehan hafoin partisipa iha komemorasaun loron mundiál mariñeiru ho tema “ha’u-nia ró livre hosi diskriminasaun”, iha sala leitura Xanana Gusmão Lecidere, kuarta ne’e.
Nia dehan tema ne’e hodi promove mariñeiru no zero toleránsia ba diskriminasaun no asédiu sira.
Nia hatutan AMTL iha ona rekursu 200 resin ne’ebé treinadu no kompañia Bayu Undan uza ona timoroan servisu iha sira-nia kompañia.
“Ita-nia membru daudaun ne’e balun servisu ona iha Bayu Undan iha kompañia internasionál, ema fó fiar. Entaun asosiasaun ida-ne’e hamriik hodi fanu joven hotu atu tau atensaun ba ita-nia sirkunstansia soberania hodi fó atensaun másima saída mak presiza hotu-hotu ninia kontribuisaun ba setór marítima”, nia dehan.
Nia mós afirma governu tau ona polítika ba ekonomia azul hodi assegura diversidade maritima, diversidade ekonomia entaun asosiasaun ida-ne’e hamrik hodi fanu jerasaun kontinuadór toma responsabilidade ba tasi.
“La’ós de’it forsa armada ninia responsabilidade, la’ós de’it polísia marítima nia responsabilidade, la’ós de’it ministériu peska nia responsabilidade, maibé ita hotu nia responsabilidade”, katak nia.
Mesmu hasoru limitasaun no dezafiu, nia dehan rezolve ida por ida tanba nasaun la’ós haree de’it setór ida, maibé presiza haree setór hotu hotu.
Serimónia ne’e hetan partisipa husi estudante ensinu sekundária jerál 10 Dezembru no mos joven sira.
Notísia relevante: AMTL sujere Governu tau importánsia ba setór marrítima
Jornalista : Osória Marques
Editora : Rita Almeida
