APC distribui materiál rekuperasaun ba vítima dezastre naturál 72 iha Vikeke
VIKEKE, 25 Juñu 2025 (TATOLI)—Autoridade Protesaun Sivil (APC, sigla portugés) hamutuk autoridade munisípiu Vikeke, kinta ne’e, distribui materiál rekuperasaun ba vítima dezastre naturál husi tinan 2023 to’o 2024 nian hamutuk uma kain 72 iha munisípiu Vikeke.
Notísia Relevante: Vítima dezstre naturál uma kain 72 Vikeke sei hetan materiál rekuperasaun
“Apoia materiál rekuperasaun ne’e atividade kontinuasaun, nune’e ba tinan ida-ne’e ita kontinua fó apoia materiál rekuperasaun nian ba benifisiáriu sira, atu vítima sira uza materiál sira-ne’e hodi hadi’ak fila-fali uma ne’ebé hetan estragu iha tinan kotuk ba ahi han uma, inundasaun, anin boot sobu uma ne’ebé ami rekolla dadus. Apoiu ne’e atu vítima sira uza materiál sira-ne’e hodi hadi’ak fila-fali uma ne’ebé hetan estragu,” Komadante APC munisípiu Vikeke, Cirilio Soares Gomes, hateten iha serimónia distribuisaun materiál rekuperasaun, iha armajen APC Vikeke, Sira Lari, ohin.
Nia hatutan, dadus vítima dezastre naturál ne’ebé APC haruka ba nasionál no hetan aprovasaun ne’e hamutuk uma kain 72 husi postu administrativu lima ne’ebé eziste iha Vikeke.
“Nune’e, ohin, ami fahe ba ekipa rua mak ekipa ida fahe ba postu rua Vikeke Vila no Ossú benifísiáriu hamutuk uma kain 38. Aban, ami sei kontinua distribui ba postu tolu mak postu Lakluta, Uatulari no Uatukarbau hamutuk uma kain 34,” nia hateten.
Tuir dadus, totál vítima dezastre naturál hamutuk 72 ne’ebé hetan rekuperasaun husi kategória tolu mak kategoria aat totál hamutuk uma kain 18, aat naton uma kain 16 no aat kmaan hamutuk uma kain 38.
Materiál rekuperasaun ne’ebé vítima sira simu tuir kategória tolu hanesan kategória aat totál kada uma kain simu zinku 50, besi baja 50, besi beton 50 no kompletu ho materiál konstrusaun seluk tan inklui osan $1.000. Nune’e, kategória aat naton ne’e simu zinku tahan 50, besi baja 50 no osan Mão de Obra $750. Kategoria aat kmaan ne’e simu zinku tahan 50 no osan mão de Obra $750.
Tuir tabele subsídiu ba vítima afetadu kompostu husi aat totál ne’e husi osan mão de obra $850 no osan selu transporte $150 entaun totál hamutuk $1000. Kategoria aat naton orsamentu ba mão obra hamutuk $600 ho osan selu transporte tula tsasán $150 ho totál hamutuk $750. Aat kmaan ne’e orsamentu husi ba mão obra hamutuk $450 ho osan selu transporte tula sasán $150 totál hamutuk $600.
Iha fatin hanesan, komandante Polísia Nasionál Timor-Leste (PNTL) munisípiu Vikeke, Superintendente Polísia Antonio Rego Fernandes, hato’o parabéns ba APC tanba oferese ona materiál rekuperasaun ba vítima afetadu dezastre naturál sira hodi hadi’a sira-nia uma.
“Materiál sira-ne’ebé APC apoia ba vítima sira tenke uza hodi halo fila-fali uma. Nune’e, ba vítima sira bainhira konstrui uma tenke haree fatin halo uma no labele halo tán uma iha fatin sira-ne’ebé sai risku dezastre naturál,” nia dehan.
Iha biban ne’e, reprezentante vítima afetadu dezastre naturál husi aldeia Luha, suku Uma Ki’ik, Anaquleto Amaral, hato’o agradesementu ba Governu ne’ebé apoia ona materiál rekuperasaun nian ba vítima sira hodi konstrui fila-fali sira-nia uma.
“Ami sente kontente tanba Governu apoia ona materiál ba ami. Materiál sira-ne’ebé ohin ami simu, ba oin ami sei uza hodi konstrui ami-nia uma,” nia hateten.
Iha serimónia distribuisaun materiál rekuperasaun ne’e hetan akompaña husi reprezentante autoridade munisípiu Vikeke, APC nasionál, xefe suku no vítima dezastre naturál sira husi postu Ossú no Vikeke Vila.
Jornalista : Vitorino Lopes da Costa
Editór : Cancio Ximenes
