VIKEKE, 03 Juñu 2025 (TATOLI)—Komandante Autoridade Protesaun Sivil (APC, sigla portugés) munisípiu Vikeke, Cirilio Soares Gomes, informa APC Vikeke fó sai ona lista vítima dezastre naturál husi munisípiu Vikeke hamutuk uma kain 72 mak sai benifisiáriu ne’ebé sei hetan materiál rekuperasaun.
“Materiál rekuperasaun ba vítima dezastre naturál husi tinan kotuk nian, foin lalais ne’e ami simu ona lista husi APC nasionál. Nune’e, lista ne’ebé iha atu simu materiál rekuperasaun ba vítima husi munisípiu Vikeke ne’e hamutuk uma kain 72 ne’ebé sei hetan materiál konstrusaun hodi vítima sira hadi’a fali sira-nia uma ne’ebé estragu husi dezastre naturál,” Cirilio Soares Gomes hateten ba Agência Tatoli iha ninia kna’ar fatin, Sira-Lari, ohin.
Nia informa, kalendáriu distribuisaun husi APC nasionál ba munisípiu Vikeke ne’e sei distribui iha fulan-Juñu husi loron 03 to’o 05 Juñu 2025, maibé sei iha mudansa iha nasionál tanba ne’e mak agora seidauk distribui.
“Iha kalendáriu ne’e ita fahe ohin, maibé difikuldade transporte tula materiál mai munisípiu Vikeke mak sai difikuldade. Tanba ne’e mak seidauk distribui materiál ba vítima sira. Nune’e, ami sei komfirma fila ba nasionál hodi fó data fixu ba ami, hafoin pasa tutan ba postu sira, atu vítima sira simu sira-nia materiál,” nia dehan.
Nia dehan, materiál rekuperasaun ne’ebé vítima dezastre naturál sira sei simu mak hanesan zinku, besi beton, besi baja, semente inklui orsamentu operasaun ba vítima sira.
“Vítima hirak ne’ebé hetan apoiu ho kategória tolu ne’e kompostu husi kategoria aat totál kada uma kain simu zinku 50, besi baja 50, besi beton 50 no kompletu ho materiál konstrusaun seluk tan inklui osan $1.000. Nune’e kategoria aat naton ne’e simu zinku tahan 50, besi baja 50 no osan Mao de Obra $750, no kategoria aat kmaan ne’e simu zinku tahan 50 no osan mao de Obra,” nia hateten.
Tuir tabele subsídiu ba vítima afetadu kompostu husi aat totál ne’e husi osan mao de obra $850 no osan selu transporte $150 entaun totál hamutuk $1000. Kategória aat naton orsamentu ba mao obra hamutuk $600 ho osan selu transporte tula sasán $150 ho totál hamutuk $750. Aat kmaan ne’e orsamentu husi ba mao obra hamutuk $450 ho osan selu transporte tula sasán $150 totál hamutuk $600.
Jornalista : Vitorino Lopes da Costa
Editór : Cancio Ximenes
