DILI, 24 Juñu 2025 (TATOLI)—Komisáriu Komisaun Antí Korrupasaun (CAC-sigla portugeza), Rui Pereira dos Santos, hateten CAC nia buska no apreensaun ba atuál Diretór Programa Dezenvolvimentu Suku (PNDS) ho inisiál ES, iha Munisípiu Manatutu, kuarta (18/6), bazeia ba mandadu judisiáriu husi Tribunál.
“Kazu PNDS iha Manatutu nian ita halo pedidu bá Ministériu Públiku no Ministériu Públiku halo pedidu bá Tribunál no Tribunál hasai ona despaxu autorizasaun mak ita bá halo buska,” Rui hateten ba jornalista sira iha nia kna’ar fatin, Faról, Dili, tersa ne’e.
Rekorda fali katak, antes ne’e, ekipa konjunta kompostu husi Komisaun Antí Korrupsaun (CAC-sigla portugeza), ekipa Investigadór Unidade Informasaun Seguransa (UIS) ho Diresaun Investigasaun Kriminál Polísia Nasionál Timor-Leste (PNTL), buska Diretór Progama Nasionál Dezenvolvimentu Suku (PNDS) ho inisiál ES tanba suspeitadu ba prosesu utilizasaun orsamentu PNDS la tuir regra orsamentál ne’ebé la’o iha Munisípiu Manatutu.
Notísia relevante: Ekipa konjunta buska Diretór PNDS Manatutu
Buska domisiliária no apreensaun ne’e ekipa konjunta ezekuta mandadu judisiál husi Tribunál Judisiál Primeira Instánsia Baucau ho NUC. 0005/25.CACTL, no hala’o iha edifísiu Administrasaun Munisípiu Manatutu.
Iha prosesu buska no apreensaun ne’e, ekipa konjunta asegura sasán no dokumentu barak. Ekipa konjunta sei bá suspeitu nia uma atu rekolla tan dokumentu balun no identifika suspeitu nia kareta privada.
Jornalista: Natalino Costa
Editór: Xisto Freitas da Piedade
