DILI, 25 Juñu 2025 (TATOLI)-Ekipa konjunta husi Intitutu Defeza ba Direitu Labarik (INDDICA, sigla portugés), Ministériu Solidariedade Sosiál no Inkluzaun (MSSI) hamutuk ho eskuadra Polísia Nasionál Timor-Leste (PNTL) Don Alexo identifika labarik fa’an dalan ninin maioria husi Oekusi.
“Tinan 2025 INDDICA koordena ho ekipa Oekusi atu halo ajustamentu ba labarik sira husi Oekusi n’ebé barak hela iha Dili. Dadus fó hatene katak labarik 39 husi Oekusi mak identifika iha estrada ninin, maibé ita seidauk identifika munisípiu sira seluk”, Xefe Monitorizasaun INDDICA, Isaias Pereira, hatete iha Timor Plaza, ohin.
Nia dehan labarik sira-ne’e identifika hafoin ekipa halo ajustamentu iha área Timor Plaza, Merkadu Komoro nian, no Aitarak laran.
Husi avaliasaun ne’e, problema ekonomia mak obriga labarik sira ne’e fa’an iha dalan ninin. Ho situasaun ne’e, nia dehan parte ekipa ho família halo deklasaun iha formuláriu konsiente atu garante labarik sira la fa’an tan iha estrada ibun.
Kordenadora MSSI iha postu administrativu Don Aleixo, Domingas Moniza Barros, haktuir kondisaun moris husi labarik sira ne’e balun difisil.
Nia dehan bainhira relatóriu entrega ona mak MSSI sei foti alternative ba apoiu liuhusi programa apoiu pontuál.
Tuir observasaun jornalista iha terrenu katak servisu konjuta INDDICA nia foti labarik na’in-rua iha área Timor-Plaza no seluk halai. Na’in-rua ne’e parte relevante foti entrega direta ba sira-nia inan-aman iha Merkadu Komoro.
Notísia relevante: PN husu Governu tau atensaun ba labarik faan sasán iha dalan ninin
Jornalista : Osória Marques
Editora : Rita Almeida
