DILI, 12 Maiu 2025 (TATOLI) – Deputada husi bankada FRETILIN, Cristina Yuri Ribeiro, kontinua husu ba Governu atu toma atensaun séria ba menoridade sira fa’an sasán iha dalan ninin.
“Asuntu ne’e la’ós ha’u de’it mak levanta, maibé ne’e levanta husi Bankada Governu mós, hahú husi tinan kotuk to’o mai agora, sobre labarik sira ne’ebé kontinua fa’an sasán iha dalan ninin to’o kalan ho idade ki’ik tebes, balun tinan hitu ka ualu”, deputada ne’e hato’o liuhusi plenária Parlamentu Nasionál (PN), ohin.
Nia dehan bainhira observa labarik sira fa’an sasán iha fatin públiku hodi ajuda família ne’e hatudu situasaun tristeza ida. “Tanba kestaun ne’e la’ós hatudu de’it sobre pobreza, maibé ita ko’alia ona ba direitu justisa”, akresenta.
Deputada ne’e salienta katak responsabilidade Governu nian mak Timor-Leste iha ona lei atu proteje labarik sira no PN ratifika ona tratadu internasionál no iha mós lei protesaun labarik sira-nian.
“Mais buat ne’e ita haree ba mai iha de’it suratahan leten, realidade hatudu oin seluk loos. Labarik sira ho idade hanesan ne’e tuir loloos bá eskola, maibe tenke fa’an fali sasán iha dalan hodi ajuda família”, nia preokupa.
Hodi salienta katak dalabarak ema fó sala ba labarik sira, maibé sira la sala bainhira la bá eskola no fó sala mós ba família dehan la interese ba labarik sira. “Maibé, ha’u fiar katak família interese, falla loloos ne’e iha sistema [ne’ebé] la fó alternativa ba sira atu sai husi situasaun ida-ne’e”, katak.
Nia husu Governu atu investe sériu iha área sira ne’ebé importante hanesan edukasaun no aplika mós lei sira ne’ebé iha no fó mós asisténsia ba família sira ne’ebé iha difikuldade.
“Tanba labarik sira ne’e tenke eskola iha aula laran, la’ós iha fali estrada ninin hodi fa’an fali sasán. Se ita hakarak futuru ne’e di’ak ba Timór, ita tenke hahú proteje ona labarik sira ne’e hahú ohin”, nia rekomenda.
Reprezentante Governu, liuhusi Vise-Ministru Asuntu Parlamentár, Adérito Hugo da Costa, rejista preokupasaun referida no sei enkamiña ba ministériu tutela.
Rekorde katak, Institutu Nasionál Defeza Direitu ba Labarik, Institutu Públiku (INDDICA, iha portugés) rejista iha 2024, menoridade ne’ebé fa’an sasán iha dalan ninin hamutuk na’in 100-resin.
Notísia relevante: Jerente INDDICA preokupa Timor-Leste laiha fatin asisténsia sosiál ba labarik iha dalan
Jornalista: Nelson de Sousa
Editora: Maria Auxiliadora
