BOBONARU, 26 Juñu 2025 (TATOLI)—Xefe suku Ritabou, postu administrativu Maliana, munisípiu Bobonaru, Maximiano dos Santos Araújo, husu ba Sekretáriu Estádu Kooperativa (SECoop, sigla portugés), atu identifika no prepara didi’ak rai molok kuda Bafo Kay Rala nune’e bele moris no fó rezultáau produsaun di’ak.
Notisia Relevante: SEKooP kuda Bafo-Kayrala ektar rua iha Halekou Ritabou
Nia hato’o rekomendasaun ne’e tanba rai ektare ida (1) ne’ebé ekipa SECoop identifika no halo lansamentu Kuda Bafo Kay Rala iha aldeia Halekou iha loron 26 Setembru 2025 la fo rezultadu di’ak ka la moris.
“Naton ida halo lansamentu ne’e, ba ha’u-nia haree, loloos ne’e rai ne’e ita presiza fila di’ak lai, depois mak ita bele kuda. Momentu ita halo lansamentu rai ne’e, tratór fila de’it no rai kafuak hela, depois ita ba lansamentu no ikus rezultádu ladiak. Ne’e signifika ita-nia preparasaun ladún di’ak, tanba ne’e mak ba futuru ida-ne’e nafatin la’o. Ita presiza haree didi’ak, fila-rai halo didi’ak, kolabora ho parate hotu-hotu depois mak kuda. Atu nune’e, ba future, komunidade bele sente ninia rezultádu ne’ebé mak di’ak,” Nia informa ba jornalista sira, iha Halekou, kuarta ne’e.
Vise Movimentu Kamponezes Timor-Leste (MOKATIL) munisípiu Bobonaru, Eduardo Cradoso Soares, hateten SECoop ho membru parlamentu, autoridade munisípiu no komunidade sira halo lansamentu Kuda Bafo Kay Rala ne’e ladún preparadu tanba laiha lutu no bee menus.
“Ita haré ba klima, momentu kuda ne’e udan mai ne’e mak nia dodok tiha fila-fali. Momentu ne’ebá ita haree ita-nia rai abandona ne’e mak ita kuda, maibé rai ne’e kala la simu. Depois problema tan ho nia fini ne’ebé ladi’ak ne’e mak la moris ne’e Bafo Kay Rala ne’e sensitivu uitoan. Nia tempu bailoro ita tenke hatama lalais bee,’nia tenke bokon hela de’it. Nia kuandu rai-maran ne’e nehek mai han, nia kuak ona labele moris ona,” nia hateten.
Nia afirma, momentu ne’ebá ekipa SECoop ho MOKATIL deside halo lansamentu iha fatin ne’e, tanba rai ne’e abandona no laiha ekipamentu ida atu halo klasifikasaun ba rai ne’ebé di’ak no serve duni atu kuda Bafo Kay Rala.
“Ne’e mak ninia rezultadu ladi’ak. Ho ida-ne’e mak ami halo mudansa segunda faze kuda fila-fali ba tempu udan nia. Iha asrama, amu-nia ne’ebá ne’e, agora ita kolleta ona ektare tolu, prosesu ona husi nasionál atu mai hola,” nia afirma.
Bafo Kay Rala hanesan produtu aihan saudável no nutritivu ne’ebé riku ho karbohidrat, proteina no vitamina.
Notisia Relevante : PAM Bobonaro husu agrikultór sira kuda Bafo-Kayrala
Jornalista : Sergio da Cruz
Editór : Cancio Ximenes
