BOBONARO,11 marsu 2024 (TATOLI)-Prezidente Autoridade Munisipál (PAM) Bobonaro, Alexandrino Pires, husu agrikultór sira iha munisípiu ne’e atu utiliza rai-mamuk sira atu kuda Bafo-Kayrala, tanba ai-haan lokál ne’e iha valór nutrisaun aas no diak ba ema-nia saúde inklui bele hetan rendimentu hodi sustenta ekonomia família.
Nia hato’o apelu ne’e hafoin akompaña Sekretáriu Estadu Kooperativa, Arsénio Perreira, lansa no kolleta Bafo-Kayrala iha aldeia Sekar, suku Holsa no kolleta iha aldeia Manu-Aman, suku Tapo-Memo, postu administrativu Maliana, segunda ne’e.
Notísia relevante: SEKoop lansa programa kuda Bafo-Kayrala iha Pante Makasar
“Ita tenke ser mai ho hanoin foun, inovativu, dalaruma rai-mamuk, ita husik hela de’it, hau husu ba inan-aman sira kuda Bafo Kayrala, labele hein de’it estadu, tanba ita atu fahe osan ba malu lato’o, Bafo Kayrala ne’e modelu ida atu ita hetan osan,” nia hateten.
Prezidente Autoridade Munisipál ne’e hatutan, kuda Bafo-Kayrala hanesan produtu lokál ida-ne’ebé di’ak hodi substitui importasaun ai-haan hosi rai-li’ur.
“Atu responde ba ida-ne’e ita tenke ser kuda,bne’e oportunidade di’ak, atu ita bele trava osan labele sai ba rai-li’ur, sirkula de’it iha rai-laran. Ida-ne’e ita kuda aban bainrua programa merenda eskolár mós bele uza, entaun osan kada tinan aloka ba programa ne’e, sei tún fali ba inan-aman sira,” nia dehan.
Nia dehan, iha tempu badak envolve ekipa SEKoop iha atividade vizita tama sai postu no suku sira, hodi habelar informasaun ba komunidade sira kona-bá importánsia hosi Bafo Kayrala.
Alexandrino promete, hahú aban sei halo koordenasaun ho líder komunitária sira no Terras Propriedades atu identifika rai ba kuda Bafo-Kayrala.
Aldende ne’e sei ko’alia ho emprezáriu lokál sira, atu halo investimetu ba produtu ne’e.
“Ha’u halo enkontru ho Word Food Programme (WFP), sira esplika mai ha’u, ai-haan ne’e ninia nutrisaun ne’e boot la halimar, entaun ita presiza kuda atu labele dependénsia demais ba ai-haan sira hosi rai-li’ur,” nia katak.
Diretór Servisu Munisipál Agrikultura, Munisípiu Bobonaro, Longuinhos João, reforsa, Bafo Kayrala di’ak ba ema-nia saúde,vtanba riku ho karbohidrat, proteínia, vitamina no minerál.
Nia hateten, Bafo Kayrala eziste desde tempu avo sira-nia,!maibé durante ne’e komunidade seidauk abitua konsumu, tanba ne’e ba oin Diresaun Servisu Munisipál Agrikultura sei koopera ho SEKoop atu dezenvolve produtu ne’e, hodi bele responde ba nesesidade rai-laran.
“Bafo ne’e hanesan ita halo diversifikasaun ba ai-haan, ita bele dezenvolve Bafo ne’e sai doxi bolus, paun nune’e ita bele fornese ai-haan ne’ebé diak ba komunidade no ba programa merenda eskolár, tanba ita hatene katak Bafo ne’e ai-haan ne’ebé ho ninia nutrisaun aas, la lakon ho foos no batar,” nia akresenta.
Notísia relevante: KRO aprova orsamentu SEKoop millaun $5,2 inklui adisionál
Jornalista: Sérgio da Cruz
Editór: Evaristo Soares Martins
