DILI, 28 Juñu 2025 (TATOLI)—Ekipa konjunta sei halo kontrola hodi fó vasina ba animál asu no busa ne’ebé la’o livre iha espasu públiku sidade Dili.
Atividade operasaun sei hala’o iha semana oin tanba daudaun ne’e sei hein ekipa téknika sei prepara matéria.
Ekipa konjunta ne’e kompostu husi Ministériu Administrasaun Estatál (MAE) liuhusi Sekretaria Estadu Asuntu Toponímia no Organizasaun Urbana (SEATOU), Ministériu Agrikultura Pekuária Peska no Floresta (MAPPF), Ministériu Saúde (MS), Autoridade Seguransa no Defeza, inklui líder komunitáriu sira.
Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, ekipa konjunta sei halo kontrola hodi fó vasina ba animál ne’ebé na’in laiha no la’o livre.
“Ita tenke halo atividade ne’e tanba razaun ne’ebé mai husi Ministériu Saúde no Ministériu Agrikultura, Pekuária no Peska, katak moras raiva ne’e komesa iha ona no estraga ema-nia vida,” Sekretáriu Estadu informa iha salaun MAE, Kaikoli, Sesta ne’e.
Notísia relevante : Ministériu tolu forma ekipa konjunta ba prevensaun moras raiva
Governante ne’e dehan, ekipa sei esforsu hodi haree asu sira-ne’ebé la’o livre iha espasu públiku, enkuantu asu sira-ne’ebé na’in laiha no la’o livre iha estrada laran, ekipa sei lori ba sulan iha MAPPF nia fatin, depois na’in bele bá buka iha ne’ebá.
“Entaun, husu ba hotu-hotu tenke kuidadu ho nia animál rasik, katak tenke sulan ka kesi iha kintál laran,” Governante ne’e apela.
Iha biban, nia husu ba komunidade ne’ebé fa’an na’an asu tasak (RW) ne’e tenke kuidadu atu labele hada’et fali ba ema seluk ne’ebé han.
“Hakarak fa’an RW karik bainhira asu ne’ebé la pozitivu ba moras raiva. Tenke konsulta ho parte kompeténsia ne’ebé reaponsabilidade ba raiva, katak na’an ne’e bele han ka lae? Maibé se asu ne’e seidauk hetan vasina di’ak liu lalika. Tanba ita-nia vida valór liu duke animál,” nia fó hanoin.
Nia mós alerta ba komunidade atu kuidadu ho asu no busa, atu labele hada’et ba viziñu no ema seluk.
Jornalista : Alexandra da Costa
Editora : Julia Chatarina
