KOVALIMA, 27 Juñu 2025 (TATOLI) –Reprezentante Sekretáriu Estadu Formasaun Profesionál no Empregu liuhusi Dirasaun Jerál Formasaun Profesionál no Empregu ho Dirasaun Nasionál no Empregu organiza atividade feira karreira no edukasaun ho semináriu ba estudante Ensinu Sekundáriu Jerál (ESG) no Tékniku Vokasionál (ESTV), iha Postu administrativu Tilomar, Munisípiu Kovalima.
Feira karreira ne’e hala’o durante loron rua – entre loron 27 no 28 Juñu, ho nia tema “Atinji futuru brilliante liuhusi asesu ba informasaun karreira rede profesionál, Formasaun vokasionál edukasaun no programa servisu iha rai-laran no rai-li’ur”.
“SEFOPE kria feira ida-ne’e hanesan espozisaun hodi hatutan hanoin no mehi ita-nia alin sira daudaun ne’e iha ho nia polítika atu lori informasaun besik mai iha postu administrativu” Reprezentante SEFOPE, Jacinto Ribeiro Dias hato’o liuhusi nia diskursu iha resintu administrasaun postu Tilomar, ohin.
Reprezentante ne’e relembra katak iha tinan hirak ba kotuk esposizaun hala’o iha nível munisipál haree ba prezensa hodi halo analiza di’ak, alvu rekursu sira barak iha suku no aldeia sira ho nune’e muda polítika lori mai iha Postu administrativu Tilomar, ho intensaun fahe informasaun besik mai ho maneira liuhusi komunikasaun no organiza mós feira hanesan parte oportunidade ida lori informasaun hakbesik ba alunu sira ne’ebé mak sei finaliza nia estudu.
Ho nune’e, Governu liuhusi SEFOPE lori mehi ba estudante sira liuhusi atividade organiza feira karreira no edukasaun
“Atividade feira ne’e hala’o forma sira hanesan organiza semináriu no vizita stand sira feira lori ita-nia koñesementu sá mak moris ne’e ho nune’e SEFOPE nia planu oinsá kria formasaun rai-laran no li’ur tanba ema presiza hahú uluk formasaun no informasaun”, nia dehan.
Reprezentante SEFOPE husu ba estudante sira atu aproveita oportunidade nune’e bele hatene sira atu ba ne’ebé? Ba sosiedade no nasaun ida-ne’e tau hanoin hamutuk ho nune’e SEFOPE nia parte fahe informasaun no estudante sira mak atu simu informasaun sai hanesan bukae.
Pontu informasaun (stand) ne’ebé daudaun partisipa iha feira ne’e ema sira ne’ebé mak mai ho dezafiu hahú no prosesu stand sira ne’e mak partisipa iha feira ne’e mak hanesan husi SEFOPE, Gropu Raimal Tilman, Uma-mahon salele, Centru Comunidade Covalima, IADE, CVTC Suai, Telemor, Titalia, FDCH, Tane tetuk, Grupál no Florestál hodi aprezenta idaidak nia produtu sira.
Iha sorin seluk, Reprezentante Prezidente Autoridade Munisípiu Kovalima, José Manuel Gonçalves, reforsa, jerasaun foin-sa’e sira maka rikusoin ida-ne’ebé iha valór ba nasaun ida- ne’e. Sira maka susesór dezenvolvimentu nian, inovadór sira no atu sai líder ida-ne’ebé di’ak iha futuru.
“Ita atu fó oportunidade luan ba sira atu dezenvolve sira-nia potensiál, tantu liuhusi edukasaun no oportunidade serbisu ne’ebé produtivu. Iha era atuál ita tama ona ba globalizasaun no dezenvolvimentu teknolójiku ne’ebé lalais, dezafiu no oportunidade mosu oioin de’it, jerasaun foin-sa’e sira bele adapta, hadi’a sira-nia kompeténsia no aproveita oportunidade oioin ne’ebé iha atu hetan susesu no prosperidade”, nia haklaken.
Reprezentante Autoridade Kovalima ne’e mós dehan, daudaun ne’e moris iha era ida-ne’ebé nakonu ho transformasaun dijitál mudansa iha klima ekonómiku globál, no avansu teknolójiku sira ne’ebe muda lalais ona ho signifikativu paizajen mundu serbisu nian.
Ho nune’e iha situasaun hanesan ne’e, jerasaun foun sira tenke preparadu, la’ós de’it atu sai ema ne’ebé buka serbisu, maibé mós atu sai kriadór empregu, inovadór, no líder futuru nian. Espozisaun ida-ne’e hala’o hanesan fórum ida atu halibur ema sira ne’ebé buka serbisu, autór sira iha indústria, instituisaun edukasionál no organizasaun sira ne’ebé envolve iha dezenvolvimentu rekursu umanu.
Iha atividade ne’e, partisipante sira sei hetan informasaun kona-ba oportunidade karreira oioin, programa formasaun, bolsa estudu no inovasaun ikusliu iha mundu edukasaun no mundu serbisu nian atu atinji futuru brilliante liuhusi asesu ba informasaun karreira professionál, formasaun vokasional, edukasaun no programa servisu, tantu iha rai-laran no mós rai-li’ur.
Ho atividade ida-ne’e, hanesan autoridade iha munisípiu Kovalima, hein katak liuhusi atividade ida-ne’e, jerasaun foun sira bele komprende di’ak liután importánsia hosi auto- dezenvolvimentu, hadi’a kompeténsia no utiliza oportunidade sira ho di’ak liu atu nune’e bele sai traballadór sira ne’ ebé produtivu no inovativu.
Notísia relevante:SEFOPE partilla informasaun kona-ba kriasaun oportunidade empregu no formasaun iha Tilomar
Jornalista:Celestina Teles
Editór: Rafael Ximenes de A. Belo
