KOVALIMA, 27 Juñu 2025 (TATOLI) – Sekretáriu Estadu Formasaun Profesionál no Empregu (SEFOPE) partilla informasaun kona-ba papél SEFOPE nian ba kriasaun oportunidade empregu no formasaun ba estudante sira iha nível Ensinu Sekundáriu Jerál (ESG) no Tékniku Vokasionál (ESTV), iha Postu administrativu Tilomar, Munisípiu Kovalima.
Informasaun ne’e partilla hosi Diretór Jerál Formasaun Profesionál no Empregu, Carlito Rosário Cabral kona-ba pontu importante tolu hanesan introdusaun dekretu-lei, vizaun, misaun, opsaun ba graduadu, tipu formasaun, pontu atributu polítiku formasaun profesionál no Diresaun Nasionál Relasaun Traballu (DNRT).
“Ami mai lori informasaun hodi ko’alia kona-ba papél SEFOPE hodi halo introdusaun servisu husi SEFOPE liuhusi baze legál”, Carlito Rosário Cabral, hato’o liuhusi nia aprezentasaun iha salaun administrasaun Postu Tilomar, ohin.
Informasaun ne’e mak diretór-jerál SEFOPE fahe mak hanesan baze legál dekretu-lei númeru 80/2023, 11 Outubru kona-ba orgánika Sekretária Estadu Formasaun Profesionál no Empregu hanesan formasaun profesionál, empregu no traballu.
Dekretu-Lei n.º 80/2023, de 11 Outubru ne’e define estrutura, funsaun no kompeténsia institusionál SEFOPE nian, hodi reforsa nia papél iha promosaun formasaun profisionál no polítika empregu iha Timor-Leste.
Lei ne’e fó baze legál ba SEFOPE atu implementa Estratéjia Nasionál Empregu 2017–2030 no kontribui ba dezenvolvimentu kapitál umanu iha Timor-Leste
Notísia relevante: https://tatoli.tl/2024/12/12/sefope-halo-seminariu-ba-implementasaun-politika-estratejia-nasional-empregu-2017-2030/
Vizaun SEFOPE, Timor-Leste iha sistema formasaun profesionál ne’ebé enkoraja empregabilidade, produtividade no mós kompetetivu ba nia ema sira atu bele kontribui ba prosperiedade no dezenvolvimentu sosio-ekonómiku nasaun.
Misaun SEFOPE, aliña polítika formasaun profesionál ne’ebé efetivu no sustentavel tuir nesesidade merkadu traballu iha rai-laran no rai-li’ur. Estabelese parseria ho país sira seluk iha área formasaun profesionál no empregu.
Estabelese no reforsa sentru formasaun iha nível munisípiu. Hametin relasaun entre governu setór privadu no parseiru dezenvolvimentu .
Kriasaun empregu liuhusi melloria kualidade formasaun hanesan instrumentu fundamentál hodi sai husi ki’ak ho perespetiva ida, kontinuadade no sustentabilidade no promove traballu dignu liuhusi diálogu sosiál.
Tipu formasaun profesionál hanesan formasaun regulár, movél, estajiu profesionál no formasaun TOT (Training of Trainer – Formasaun formadór sira), tipu formasaun empregu rai-laran, rai-li’ur, empregu temporáriu no auto-empregu.
Pontu importante tuirmai mak atributu polítika formasaun profesionál, inkluzividade formasaun profesionál, sistema ne’ebé responsavel, fasilidade no ekipamentu ne’ebé kualidade no adekuadu, iha komitmentu (kompromisu) fundu ba formasaun, polítika formasaun profesionál, formadór kompetente iha esperiénsia karreira prometidu, formandu ne’ebé prontu atu servisu no relasaun forte ho governu, setór privadu ho parseiru dezenvolvimentu.
No, pontu importa ikus mak diresaun nasionál relasaun traballu mak promove relasaun traballu, kondisaun servisu, diálogu sosiál, mediasaun, konsiliasaun, servisu dignu no ambiente servisu ne’ebé armónia.
Oradór sira iha semináriu ne’e mak ba dahuluk husi SEFOPE, Diretór Jerál- Formasaun Profesionál no Empregu, Carlito Rosário Cabral, fahe informasaun kona-ba Papél SEFOPE ba Kriasaun Oportunidade Empregu no Formasaun.
Oradór daruak mak Diretór Ezekutivu Julio Aparício kona-ba investimentu estratéjiku iha kapitál umanu, knaar FDCH liga ho kapasitasaun foin-sa’e sira hodi responde ba demanda Merkadu Traballu.
FDCH investe ba juventude Timor-oan sira hodi fó kapasidade prátiku, relevante ho nesesidade merkadu traballu — iha Timor-Leste no rai-li’ur.
Oradór ba datoluk mak Diretór UNPAZ Munisípiu Kovalima, Silvester Ferreira ba programa edukasaun inovativa ba redusaun dezempregu: Estudu kazu no prátika di’ak sira.
Notísia relevante: https://tatoli.tl/2024/11/13/pn-husu-sefope-kontinua-formasaun-joven-responde-merkadu-traballu/
Jornalista:Celestina Teles
Editór: Rafael Ximenes de A. Belo
