DILI, 27 Juñu 2025 (TATOLI)—Asistente legál matebian Zizelma Maria Fátima Verdial Gonçalves, Defensór Públiku Estaquio Guterres, hateten Tribunál Rekursu iha loron kinta (26/6), hatún ona desizaun hodi husu Tribunál Primeira Instánsia Dili (TJIPD) halo rejulgamentu ba kazu asidente tráfegu ne’ebé hakotu Zizelma nia vida iha área Delta, Komoro, 28 Marsu 2025.
Razaun Tribunál Rekursu (TR) husu Tribunál Judisiál Primeira Instánsia Dili halo rejulgamentu ba kazu ne’e, tanba TR haree tiha faktu sira-ne’ebé asistente Estaquio konsta iha rekursu hodi kontesta desizaun Tribunál ba kazu Zizelma nian provadu.
“Desizaun Tribunál Rekursu hateten iha-ne’ebá klaru, prosesu ne’ebé akontese hasoru vítima (Zizelma) Tribunál Rekursu aseita ho ha’u nia rekursu katak sei rejulga prosesu ida-ne’e,” Estaquio hateten ba jornalista sira iha TJPID, Kaikoli, sesta ne’e.
Notísia relevante: PJR nomea Prokuradór Rogério Viegas substitui Prokuradora Benvida atende kazu Zizelma
Nia haktuir katak desizaun Tribunál Rekusu husu Tribunál Primeiru Instánsia Dili atu realiza fali primeira interrogatóriu ba kazu ne’e, maibé ida-ne’e depende ba juíz ne’ebé kaer prosesu ne’e.
Estaquio dehan, iha prosesu ne’e, Ministériu Públiku troka ona prokuradór ne’ebé molok ne’e kaer prosesu ne’e, hodi delega fali bá prokuradór seluk.
“Prokuradór mak troka, maibé juíz ne’ebé antes ne’e kaer prosesu ida-ne’e nafatin,” nia konklui.
Jornalista: Natalino Costa
Editór: Xisto Freitas da Piedade
