DILI, 30 Juñu 2025 (TATOLI)-Arsebispu Metropolitana Arkiodioseze Dili, Don Virgílio Kardeál do Carmo da Silva, husu sarani sira prepara-an bainhira simu krús joven internasionál ne’ebé sei maihusi Korea Súl iha loron 23 to’o 30 fulan-Agostu 2025.
Amu Kardeál dehan orienta ona CNCJ-TL hodi aproxima Governu, liuliu parte kompetente sira atu oinsá reforsa preparativu sira hodi simu krús joven internasionál neʼebé sei mai.
Bainhira krús joven internasionál ne’e to’o iha Dili, sei hela kalan rua iha igreja Katedrál Vila Verde, hafoin lori bá Bobonaru.
“Joven sira seluk neʼebé tuir ona krús joven, aproveita bainhira krús joven internasionál ne’e mai no krús ida-ne’e mak sei lori ba iha Korea hodi selebra loron munsiál juventude neʼebé sei hala o iha tinan 2027 iha Korea Súl, ” dehan Amu Kardeál liuhusi konferénsia imprensa iha Lecidere, ohin.
Iha biban ne’e mós Prezidente Ezekutivu Komisaun Nasionál Juventude Katólika Timor-Leste (KNKJ-TL), Pe. Francisco Indra do Nasscimento Teyseran, hateten daudaun ne’e sira forma ona ekipa sinodal ida hodi responsavél ba eventu vizitasaun krús joven internasionál nian durante semana ida iha Timor-Leste.
“Vizita krús joven internasionál iha kreda Timor no jornada nasionál juventude, ekipa sinodal halo ona ajustamentu ba programa boot rua”, Prezidente Ezekutivu KNKJ-TL ne’e informa.
Padre ne’e hatutan programa ne’e mos Amu Bispu sira hatene hotu ona no sira sei partisipa iha misa abertura ne’ebé sei realiza iha Dioseze Maliana.
“Aleinde ne’e ami ekipa mós prepera hela karta audiénsia hodi hato’o ba parte Governu liuhusi Prezidente Repúblika, Primeiru Ministru no orgaun titulár sira hodi apoiu eventu ida-ne’e la’o ho di’ak to’o rohan”, amu-lulik ne’e reforsa.
Programa pastorál ba krús joven internasionál iha Timor-Leste mak hanesan:
- 23 Agostu: Bemvindo krús joven Internasionál iha kreda Timor, sei vigília iha igreja Katedrál no sei halo espozisaun promosaun vokasionál.
- 24 Agostu: Missa hamutuk ho sarani sira iha igreja Katedrál kontinua vigília iha kalan espozisaun promosaun vokasionál.
- 25 Agostu: Peregrinasaun Dioseze Maliana, hamutuk ho peregrinu sira husi Dioseze Baukau no Arkidioseze Dili hodi missa hamutuk ho sarani Dioseze Maliana iha Pro Katedrál Maliana.
- 26 Agostu: Peregrinasaun ho krús internasionál ba Parókia Bobonaru no sei missa abertura Jornada Nasionál Juventude.
- 27 Agostu: Palestra ho tema “Ha’u Hamrok” no partilha krús joven internasionál husi komisaun Korea katekeze hodi halo orasaum taize no sakramentu konfesa.
- 28 Agostu: Asaun karidade ba sarani parókia Bobonaru ne’ebé sei halo palestra husi Ministériu Juventude Desportu Arte no Kultura, input husi jovem internasionál Malázia no sei halo via-sakra inklui bensaun santíssimu ikus taka ho konsertu “Joven Barullu”.
- 29 Agostu: Missa misaun kultura rua hasoru malu “Bobonaru no Reméxio” hodi entrega krús joven ba peregrinasaun no lori hikas mai Dili. (krús joven internasionál sei hatuur iha igreja Katedrál, hafoin lori krús joven internasionál liu bá Reméxio).
- 30 Agostu: Missa enseramentu ho krús internasionál iha igreja Katedrál no halo proseisaun ba Aero portu Nicolau Lobato, Komoro hodi bá Tailándia.
Tanba ne’e husu ba sarani tomak kreda Timor nian, husi tasi feto to’o tasi mane, husi lorosa’e to’o loromonu, no parte Governu nian, mai ita la’o hamutuk hodi halo susesu ba eventu fiar nian hodi lori sarani sira liuliu ba foinsa’e sira hodi hametin liután fiar nu’udar sarani Katólika husi eventu boot ne’e.
Notísia relevante: KNJK-TL forma ekipa sinodal ba preparasaun vizita krús joven internasionál
Jornalista : Alexandra da Costa
Editora : Rita Almeida
