DILI, 30 Juñu 2025 (TATOLI)-Ministériu Solidariedade Sosiál no Inkluzaun (MSSI) hahú aban halo pagamentu ba programa bolsa da mãe kondisionál faze dahuluk.
“Hahú aban MSSI halo pagamentu ba programa bolsa da mãe kondisional hamutuk 40.309 iha territóriu”, Ministra husi Ministériu Solidariedade Sosiál no Inkluzaun, Verónica das Dores, dehan iha MSSI Kaikoli, segunda ne’e.
Nia esplika subsídiu kada fulan ba estudante benefisiáriu husi Ensinu Báziku siklu dahuluk no daruak iha $8. Estudante sira husi Ensinu Báziku siklu datoluk $9. Estudante sira husi Ensinu Sekundáriu Jerál no Ensinu Tékniku Vokasionál $10. Estudante ne’ebé ho kondisaun defisiénsia sei hetan tan adisionál $5.
Ensinu báziku siklu dahuluk no daruak hamutuk 20,208, defisiénsia iha 83 no la ho defisiénsia iha 20.125, ho nia orsamentu $164.320. Ensinu báziku siklu datoluk hamutuk 14,994, defisiénsia 23 no la ho defisiénsia iha 14.971 ho nia orsamentu $135.774. Ensinu Sekundáriu Jerál no ensinu tékniku vokasionál hamutuk 5,107, defisiénsia iha hitu no la ho defisiénsia iha 5.100 ho nia osan hamutuk $51.350.
Diretór Jerál MSSI, Florencio Pina Dias Gonzaga, hatete tinan ne’e benefisiáriu bolsa da mãe kondisionál hamutuk 40.309 kompara ho tinan kotuk iha rihun 60-resin.
“Antes ba pagamentu ita sempre halo re-verifikasaun ba dadus, entaun tinan ne’e benefisiáriu tun tanba la prenxe kritériu. Kuaze pursentu 40 ne’ebé la elijivél. Família tutór ne’ebé barak mak servisu no maiória atinje tinan 17 ba leten no família vulnerável nia balun la eskola ona”, nia esplika.
Ministra husu ba família benefisiáriu sira katak bainhira pagamentu la’o mak naran laiha ka la konsege simu, bele hato’o reklamasaun ba MSSI, nune’e MSSI bele ajusta pagamentu faze daruak nian neʼebé sei hala’o iha trimestre ikus 2025.
Bolsa da Mãe kondisional nu’udar programa governu nian neʼebé kontinua implementa hahú 2008 bazeia ba dekretu lei númeru 18/2012, 4 Abril. Dekretu lei ida-ne’e hetan alterasaun iha fulan-Janeiru 2024 tuir dekretu lei númeru 1/2024, 3 Janeiru hodi halo mudansa ba montante orsamentu ba estudante benefisiáriu sira iha dekretu lei anteriór iha artigu 10 no artigu 11.
Notísia relevante: MSSI apoia miliaun $7-resin ba benefisiáriu Bolsa da Mãe kondisionál
Jornalista : Osória Marques
Editora : Rita Almeida
