DILI, 30 Juñu 2025 (TATOLI) – Ministra Saúde, Élia Amaral, husu ba komunidade ne’ebé haki’ak asu tenke lori bá vasina iha postu movel ne’ebé parte Veterinária husi Ministériu Agrikultura, Pekuária, Peska no Floresta (MAPPF) prepara iha jardín Motaél no fatin sira seluk.
“Favór ida, lori hela ita-boot sira-nia asu bá vasina, nune’e bele evita moras raiva”, Élia Amaral apela iha Palásiu Governu, ohin.
Nia dehan importante tebes populasaun koopera ho Governu bainhira hetan sintoma ka sinál ruma husi asu ne’ebé sira haki’ak atu lori bá vasina iha fatin sira ne’ebé Governu prepara ona.
Governante ne’e saleinta katak daudaun esforsu Governu nian hodi prevene moras raiva mak aumenta ekipa task force, ne’ebé kompostu husi Sekretariu Estadu Asuntu Toponímia no Organizasaun Urbana (SEATOU), MAPPF no Ministériu Saúde (MS) hodi halo kontrolu no fó vasina ba asu no busa ne’ebé la’o livre iha espasu públiku iha Dili.
“Ekipa konjunta ne’e sei no tama sai komunidade sira-nia uma, fó vasina maibé primeiru sei tama uluk iha fronteira, depoiz mak haree fali iha área risku sira ne’ebé ita deteta”, adianta.
Nia esplika moras raiva ne’e vírus ida ne’ebé mai husi animál, liuliu asu, lekirauk no seluk tan, tanba bainhira animál sira ne’e tata ona ema tenke bá lalais simu vasina. Daudaun ne’e iha ema hamutuk 98 mak pozitivu infetadu moras raiva no hitu mak mate.
“Ema hamutuk rihun-ida-resin mak hetan vasina anti-raiva. Ekipa konjunta ne’e presiza tau atensaun rigoroza, nune’e evita preokupasaun sira kona-ba moras raiva ne’e”, nia dehan.
Tuir relatóriu, husi Janeiru to’o Juñu 2025 parte Vetereinária vasina ona asu hamutuk 1.557. Enkuantu dadus 2024 hatudu MAPPF vasina ona asu, busa no lekirauk hamutuk 52.524. Husi númeru ne’e asu 48.745, busa 3.530 no lekirauk 249.
Notísia relevante: Pasiente raiva husi Kovalima hakotu ona iis iha HNGV
Jornalista: Arminda Fonseca
Editora: Maria Auxiliadora
