KOVALIMA, 01 Jullu 2025 (TATOLI) – Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI,I.P) halo normalizasaun ba pontuasaun estrada ne’ebé kotu liga husi kapitál Kovalima ba postu administrativu sira hodi fasilita movimentu transporte públiku no privadu sira.
“Ita-nia koordenasaun ita la’o iha fati-fatin liuliu parte estrada liga husi Tilomar ba iha Postu administrativu Fatumea IGE,I.P halo hela normalizasaun relasiona udan ne’ebé la para hodi fó impaktu ba estrada halai no kotu”, Prezidente Autoridade Munisípiu Kovalima, Miguel Armada Cardoso relata ba jornalista sira, iha nia servisu fatin AMC, ohin.
Autoridade Kovalima informa katak IGEADI,I.P daudaun ne’e halo normalizasaun ba estrada husi área Aularan, aldeia Maibesi to’o iha Foho-lulik maibé difisil nafatin maske halo hela normalizasaun – foin mak dudu, rai nafatin halai, tanba udan la para.
Kondisaun klimátika iha munisípiu Kovalima daudaun ne’e udan maske IGEADI,I.P hala’o hela normalizasaun maibé rai kontinua taka nafatin ho nune’e presiza atu haree didiak estrutura rai bainhira mosu erozaun nia impaktu husi saida?
“Ho situasaun udan la para nafatin halo normalizasaun estrada hodi fasilita movimentu transporte públiku no privadu daudaun estrada seidauk bele di’ak atu halo estrada di’ak hafoin udan para mak foin ita bele haree los”, nia dehan.
IGEADI,I.P la’ós halo normalizasaun estrada iha parte Tilomar de’it maibé mós estrada Tilomar to’o iha Postu administrativu Fatumea – daudaun ne’e halo hela normalizasaun no mós estrada iha parte aldeia Bonuk aldein ne’e estrada sira iha Postu administrativu Maukatar maibé informasaun seidauk naton.
“Ita mós iha prosesu obra públika estrada kilometru 10 atu hala’o lansamentu fatuk ba dahuluk estrada liga husi munisípiu ba postu administrativu Maukatar nune’e bele rezolve kondisaun estrada ne’ebé aat”, autoridade informa.
Fó hanoin fali katak iha loron iha loron 12 Juñu 2025 ne’e, Diretór Servisu Munisipál Obra Públiku Kovalima Sidónio Gusmão identifika ona pontuasaun estrada kotu nune’e presiza atu halo normalizasaun.
Pontuasaun estrada ne’ebé aat grave no kotu mak hanesan iha Postu administrativu Tilomar iha área Halis no Maibessi estrada liga ba Postu administrativu Fatumea no estrada husi kapitál munisípiu liga ba postu administrativu Maukatar iha área Tunamaus no Lela.
Notísia relevante: https://tatoli.tl/2025/06/13/smop-kovalima-identifika-ona-pontuasaun-estrada-kotu/
Jornalista:Celestina Teles
Editór: Rafael Ximenes de A. Belo
