Estudante presiza kuda dimensaun haat ba dezenvolvimentu edukasaun iha futuru
DILI, 01 Jullu 2025 (TATOLI)-Vise-Primeiru-Ministru, Ministru Koordenadór asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, husu ba estudante sira presiza kuda dimensaun haat ba dezenvolvimentu iha futuru Nasaun ne’e nian.
“Ohin iha diálogu ne’e ko’alia kona-ba konstrusaun ba pás, konstrusaun Estadu, konstrusaun Nasaun, no konstrusaun karakter. Husi konstrusaun karakter iha dimensaun haat seluk mak fíziku, mentál, espirituál no intelektuál ne’e importante tebes ba oan sira, ba joven sira, nasaun ne’e imi nian”, dehan nia ba estudante sira Ensinu Sekundáriu Jerál no Ensinu Báziku Sentrál (EBC) 10 Desembru Komoro, tersa ne’e
Dezenvolvimentu Nasaun, nia dehan konta ho potensialidade joven sira ne’ebé ho diversidade, tanba Timoroan tenke ba oin.
“Husu ba imi tenke aprende, utiliza tempu ho didiak, imi tenke iha futuru nasaun nian, imi-nia inan-aman hein iha uma, fila karik ho matenek”, nia hato’o.
Ministru Edukasaun (ME) Interinu, Domingos Lopes Lemos, hatutan diálogu ne’e mosu hodi prevene konflitu.
“Ita tama halo sensibilizasaun pás ba estudante sira, nune’e profesór sira hanorin ho hakmatek,” atuál Sekretáriu Estadu Ensinu Sekundáriu Jerál no Ensinu Tékniku Vokasionál dehan.
Nia dehan diálogu ne’e husu ba profesór atu nafatin eduka estudante sira iha ambiente ne’ebé saudável.
Estudante Ensinu Sekundáriu Jerál 10 Desembru Komoro, Frederico Araújo, preokupa aspetu pás no karakter estudante ka juventude ne’ebé nafatin insulta malu, no baku malu iha eskola.
“Pás importante atu dezenvolvimentu Nasaun no edukasaun la’o ba oin, maibé buat ne’ebé ami preokupa mak eskola nia pesoál seguransa la sufisiente atu asegura situasaun bainhira mosu konflitu. Tanba ne’e, presiza mos tau atensaun”, dehan nian.
Nune’e mós estudante Jejinha Fernandes husu ba Ministériu Edukasaun presiza iha polítika ida oinsá kria pás iha eskola.
“Ohin loron diálogu ho ami kona-ba pás, maibé realidade ita haree eskola ida-ne’e ho eskola sekundária jerál Finantil sempre konflitu. Entaun, oinsá ita-boot sira-nia asaun ba ida-ne’e. Ami presiza iha prátika nune’e bele garante ami-nia prosesu aprendizajen iha eskola”, nia hatete.
Notísia relevante: Minimiza konflitu iha eskola, estudante na’in-55 hetan formasaun husi HADEZTA
Jornalista : Osória Marques
Editora : Rita Almeida
