DILI, 01 Jullu 2025 (TATOLI)–Ministru Edukasaun (ME) Interinu, Domingos Lopes Lemos, hatete orienta ona Servisu Edukasaun Munisípiu (SEM) Dili atu halo transferénsia ba estudante Rainha da Paz, liuliu estudante nonu anu no desimu segundu ba eskola públiku sira ne’ebé besik atu labele lakon direitu ba ezame nasionál.
Atuál Sekretáriu Estadu Ensinu Sekundáriu Jerál no Ensinu Tékniku Vokasionál hatutan buat ne’ebé importante no urjente tenke halo iha semana ne’e nia laran mak asegura estudante sira.
Notísia relevante: ME sei rezolve problema eskola Rainha da Paz
“Ohin ita informa ba sira katak edukasaun munisípiu Dili kontaktu ona eskola públika sira ne’ebé besik Rainha da Paz. Dahuluk ita rezolve uluk mak nonu anu no 12 anu, tanba sira atu tama ona ba ezame nasionál, entaun ita presiza haree asuntu ida-ne’e”, nia dehan iha eskola 10 Dezembru Komoro, tersa ne’e.
Nia dehan problema konaba estatutu ne’e kabe ba kompeténsia fundasaun nian. “Ha’u orienta ona dirijente edukasaun nian atu komunika ba servisu edukasaun munisipiu Dili, asegura estudante sira iha eskola ne’ebé besik”.
Ezame períodu daruak sei akontese iha 14 Jullu tinan ne’e, no ministériu edukasaun nia parte mós hahú prepara hodi orienta eskola sira territóriu ba realizasaun ezame ne’e.
Iha fatin seluk, Xefe Departementu Ensinu Edukasaun Munisípiu Dili, António Pereira Ximenes, hatete nia parte halo ona mediasaun ba kazu eskola Rainha da Paz, no ohin xefe suku hamutuk ho estudante sira mai husu edukasaun munisípiu Dili atu esklarese kona-ba problema referidu.
“Ensinu báziku ladún iha problema, maibé ensinu sekundária jerál mak iha problema uituan ba servisu edukasaun mak dadus estudante la submete liu-liu biografia estudante nian. Tanba ne’e ami tenke kuidadu ho di’ak”, katak nia,
Nia dehan kestaun dadus estudante presiza rezolve ho kalma, nune’e labele mosu infiltrasaun iha prosesu transferénsia.
“Ami tenke rekolla dadus sira, nune’e estudante sira mai atu lori transferénsia bazeia ba dadus”, nia realsa.
Nia hatutan, parte edukadaun foti desizaun ida katak nonu anu no 12 anu, edukasaun munisípiu sei haree eskola ida, atu estudante 60 karik sira iha fatin ida de’it, nune’e fasil hodi rezolve.
“Ba klase kiik sira ne’e depende ba lokalizasaun estudante sira nian, se nia hela iha Bekora, hakarak atu ba eskola fali iha Bekora ita prontu atu fasilita, tanba ne’e iha semana ida-ne’e nia laran tenke iha ona solusaun ba estudante sira”, nia dehan.
Xefe departementu ne’e aprofunda banhira eskola ida kuandu eziste, sei iha estudante no manorin, se estudante ho manorin la iha otomatikamente taka.
Totál estudante hosi ensinu báziku to’o ensinu sekundáriu jerál hamutuk 700 resin.
Notísia relevante: “Ami hakarak mak atu eskola”
Jornalista : Osória Marques
Editora : Rita Almeida
