DILI, 01 Jullu 2025 (TATOLI) – Meza Parlamentu Nasionál (PN), liuhusi reuniaun plenária, halo anúnsiu admisaun no baixa ba Komisaun D ne’ebé trata Asuntu Ekonomia no Dezenvolvimentu proposta lei númeru 20/VI(2a) – Lei Promosaun Esportasaun hodi bele halo apresiasaun inisiál.
Prezidente Parlamentu Nasionál, Maria Fernanda Lay, seidauk fó sai detallu proposta lei ne’e tanba komisaun sei halo uluk apresiasaun inisiál hodi hato’o relatóriu no pareser hafoin ajenda ba diskusaun jeneralidade, espesialidade no finál globál. Proposta lei ida-ne’e iha kontestu Organizasaun Mundiál Komérsiu (OMK) nian
Relembra katak, iha 12 Marsu 2025, Vise-Primeiru Ministru, Francisco Kalbuadi Lay, hanesan mós Ministru Koordenadór Asuntu Ekonómiku, aprezenta Lei Promosaun no Esportasaun nian iha Konsellu Ministru no hetan aprovasaun.
Inisiativa lei ne’e ho objetivu atu kria kuadru jurídiku ida hodi fasilita no insentiva esportasaun bens no serbisu, hametin kompetividade setór privadu nasionál no promove ambiente ida ne’ebé favoravel ba komérsiu rai-li’ur no investimentu estranjeiru.
Notísia relevante: Aprova ona Lei Promosaun Esportasaun nian
Jornalista: Nelson de Sousa
Editora: Maria Auxiliadora
