DILI, 12 Marsu 2025 (TATOLI) – Vise-Primeiru-Ministru, Francisco Kalbuadi Lay, hanesan mós Ministru Koordenadór Asuntu Ekonómiku, aprezenta, ohin, proposta lei ida iha Konsellu Ministru, kona-ba Lei Promosaun Esportasaun nian, ne’ebé hetan ona aprovasaun.
Tuin fonte husi Governu, inisiativa lejizlativa ida-ne’e ho objetivu atu kria kuadru jurídiku ida hodi fasilita no insentiva esportasaun bens no servisu, hametin kompetitividade setór privadu nasionál no promove ambiente ida ne’ebé favoravel ba komérsiu rai-li’ur no investimentu estranjeiru.
Lejizlasaun ne’e aliña ho matadalan Planu Estratéjiku Dezenvolvimentu Nasionál no kompromisu internasionál ne’ebé Timor-Leste asume, inklui adezaun ba Organizasaun Mundiál Komérsiu (OMK) no ASEAN.
“Entre medida prinsipál sira ne’ebé introdús, destaka simplifikasaun husi prosedimentu esportasaun nian, ho eliminasaun husi ezijénsia burokrátiku sira ne’ebé la nesesáriu no ho garantia previzibilidade boot-liu ba operadór ekonómiku sira”, nota ne’e esplika.
Hodi salienta katak diploma ne’e prevee mós kriasaun insentivu fiskál no administrativu ba empreza esportadór sira, rekoñesimentu formál ba empreza sira ne’ebé sertifikadu no implementasaun balkaun úniku hodi fasilita prosesu esportasaun nian.
Aleinde ne’e, estabelese mós padraun sira ba formasaun esportadór sira, liuliu empreza ki’ik no médiu sira, no promosaun zona ekonómika espesiál hodi atrai indústria sira ne’ebé foka ba merkadu estranjeiru.
Lembra katak Ajénsia Promosaun Investimentu no Esportasaun, Institutu Públiku (TradeInvest, I.P), antes ne’e, propoin ba Governu atu kria Lei Esportasaun hodi fasilita liután empreza nasionál hodi haruka prudutu bá rai-li’ur.
Iha entrevista antes ho Diretór Ezekutivu TradeInvest, Arcanjo da Silva, hateten katak ho de’it Lei Esportasaun maka bele prevee insentivu balun no estimula produtór sira-nia vontade atu prodús produtu lokál hodi esporta.
“Ami prontu atu fasilita produtór sira ne’e hodi buka merkadu, tanba TradeInvest la’ós promove de’it sira-nia produtu, maibé promove mós sira-nia empreza no ema, nune’e iha interasaun ho investidór estranjeiru, teknolojia no inovasaun foun. Tanba ho vontade di’ak maka ita bele diversifika ekonomia no kria postu serbisu ba joven”, nia dehan.
Notísia relevante: TradeInvest propoin Governu kria lei esportasaun
Jornalista: Arminda Fonseca
Editora: Maria Auxiliadora
