Timor-Leste no dezafiu globál sira iha konstrusaun ba dalan ida sustentável

Husi:

Rojer Soares

Tinan ida-ne’e, mundu envolvidu iha kontestu ne’ebé marka ho instabilidade jeopolítika no ekonómika, konflitu ne’ebé naruk iha Leste Europeu, tensaun sira iha Indo-Pasífiku no krize ne’ebé sei kontinua iha Médiu Oriente. Realidade globál hirak ne’e maski distansia la besik husi ita nia teritóriu, maibé nia efeitu haksoit liu fronteira. Iha mundu ne’ebé interligadu, maski nasaun ne’ebé kiik no pasífiku hanesan Timor-Leste sente ninia impaktu indireta husi dezafiu sira ne’e, hahú husi implikasaun ekonómika to’o rekonfigurasaun husi dinámika internasionál sira.

Timor-Leste nu’udar Estadu joven ida, ne’ebé konsolida-an ho determinasaun ba pilar sira husi ninia soberania, demokrasia no dezenvolvimentu. Ho tempu ne’ebé liuhusi tinan 20 iha restaurasaun ba ninia independensia, nasaun rejista avansu importante no signifikativu iha konstrusaun ba ninia instituisaun sira, reforsadu husi Estadu Direitu Demokrátiku hodi buka modelu ida di’ak liu ba dezenvolvimentu ne’ebé responde duni aspirasaun husi ninia povu.

Biar nune’e, ita ninia ekonomia sei nafatin iha frajilidade ho pezu boot iha dependénsia ba importasaun husi rai seluk, ba produtu esensiál sira. Presizamente iha senáriu globál insertu ida ne’e maka importante no urjente tebes  atu kontinua haforsa reziliénsia interna. Insentiva ba produsaun lokál sira, diversifika ekonomia no hamenus vulnerabilidade estruturál sira ne’ebé sai nu’udar objetivu kada-vez mais estratéjiku.

Medida hirak ne’ebé hola parte ona iha ajénda nasionál sira, manán agora relevánsia foun no presiza tebes atu hakle’an liutan ho planeamentu efikás, kompromisu sériu no vizaun ba tempu naruk. Elementu sentrál seluk maka, tuir ha’u nia haree, papel husi juventude timoroan nian ne’ebé reprezenta parte ida signifikativu husi ita-nia populasaun. Joven sira simboliza esperansa, enerjia no potensiál ba futuru. Nesesáriu tebes atu kontinua kria kondisaun sira hodi bele dezenvolve sira-nia kapasidade, hamosu oportunidade, nune’e sira bele kontribui ho forma ativa ba progresu nasionál nu’udar prioriedade partillada.

Valorizasaun ba joven sira liuhusi investimentu kontinua iha edukasaun, iha formasaun profisionál no iha insentivu ba emprendedorizmu, bele haforti la’ós de’it iha aspetu sosiál, maibé mos sai nu’udar baze ba ita nia dezenvolvimentu sustentável.

Iha planu esternu, Timor-Leste atua ho ekilíbriu no responsabilidade, hodi afirma ninia kompromisu ho diálogu, kooperasaun no respeitu ba direitu internasionál sira. Diplomasia Timorense halo boot pozisaun Nasaun nian nu’udar parseiru kredivel no defensór ba pás. Iha kontestu tensaun globál sira, hametin rumu ida-ne’e – ho polítika esterna asertiva, kooperativa no aliñada ho ita-nia interese nasionál sira sai nu’udar xave atu proteje no afirma ita-nia soberania. Iha momentu husi inserteza mundial, Timor-Leste konvidadu atu konsolida buat ne’ebé nia konstrui ona iha tinan lubuk ne’e nia laran: instituisaun forte, governasaun transparente, setór privadu ida rebustu liu no aproveitamentu intelijénte husi ita-nia rekursu naturál sira no no umanu.

Esforsu hirak ne’e labale sai elementu estruturál de’it, maibé presiza atu tradús ba asaun  konkreta sira ho impaktu vizível iha povu nia moris. Timor-Leste hatudu ona iha ninia kamiñada istórika. Katak, bele hakat liu obstáklu sira ho korajen, unidade no determinasaun.

Dezafiu ohin loron nian la hanesan ho hirak liu ba, maibé resposta kontinua depende ba ita-nia kapasidade koletiva atu atua ho responsabilidade, serenidade no vizaun estratéjika.

Maski iha mundu ida ho konfuzaun, ita bele la’o ba oin ho fiar-an no firme, hodi konstrói futuru ida ne’ebé nakonu ho estabilidade iha inkluzaun no iha autonomia.

Hakerek na’in lisensiadu iha estudu Europeu

We’en – Manatutu