Ministériu Saúde preparadu atende atleta sira iha jogu CPLP

DILI, 02 Jullu 2025 (TATOLI)—Ministériu Saúde preparadu tanba hetan apoiu másimu husi Kruz Vermella Timor-Leste (CVTL, sigla porrtugés) atu fó atendementu ba atleta sira husi nasaun membru CPLP ne’ebé partisipa iha jogu CPLP ne’ebé sei realiza iha 17-27 Jullu 2025 iha Timor-Leste.

Notísia Relevante: Ótel ualu konfirmadu fasilita delegasaun nasaun hitu partisipa jogu CPLP iha TL

“Preparasaun ba jogu CPLP husi Ministériu Saúde daudaun ne’e la’o hela hanesan mós parte Hospitál Nasionál Guido Valadares halo. Ita halo ona koordenasaun ho parseiru hanesan Krús Vermella Timor-Leste hodi apoiu ba Ministériu Saúde atu bele estabelese ona Postu Médiku iha fatin sir- ne’ebé mak idetifika ona,” Kordenadór Nasionál iha Ministériu Saúde atuál Diretór  Servisu Ambulánsia no Emerjénsia Médikamentu, Simplicio Amaral, hateten ba jornalista sira, iha nia kna’ar fatin MS, Caicoli, ohin.

Husi Ministériu Saúde iha ona ekipa saúde nasionál no preparasaun la’o daudaun ona, hanesan mós iha Hospitál Nasionál Guido Valadares maibé kona-ba saúde jerál iha ona koordenasaun lubuk ida mak ekipa sira halo ona.

“Saúde jerál iha Ministériu Saúde prepara mak ospitál mós ita prepara ona iha Lahane ne’ebá. Parte ekipa saúde nasionál iha koordenasaun lubuk ida mak ita halo ona ho parseiru sira entermus preparasaun ba ambulánsia, monta tenda postu médiku ho CVTL nia volunátriu ne’ebé mak Ministériu Saúde presiza, halo ona pedidu no sira mós fó resposta pozitivu,” nia dehan.

Krús Vermelha Timor-Leste apoiu sira-nia voluntáriu hamutuk na’in-20 no mós Servisu Saúde Munisípiu Dili inklui mós Profisionál Saúde iha Servisu Nasionál Ambulánsia Emerjénsia no Médikamentu rasik.

“Servisu saúde Munisípiu Dili mós hanesan apoiu na’in-20 no mós SNAEM rasik mós ita prepara pesoál 20-resin. Ne’ebé, kuaze hamutuk ema 100 mak sei apoiu atividade jogu CPLP,” nia haktuir.

Nia relata, fatin sira-ne’ebé mak Ministériu Saúde identifika no prepara atu monta tenda postu saúde nian ne’e hamutuk 10 ba leten, nune’e atleta sira iha problema ruma ekipa sira bele halo tratamentu lalais.

“Kona-ba tenda husi Ministériu Saúde nian iha hela, ita atu monta ba to’o fali 10 ba leten. Maibé, tuir fatin ne’ebé mak ita identifika ba fatin sira hodi halo jogu, entaun ita prepara de’it ualu (8)m 5tanba MJDAK mós ita sei monta ida iha ne’eba. Iha MJDAK ne’e, hafoin jogu CPLP ne’e sira mós sei halo konferénsia lubuk ida iha ne’ebá, entre juventude no mós asuntu CPLP nian, entaun koloka mós médiku na’in-ida iha ne’eba,” nia esplika.

Aleinde koloka iha MJDAK ne’eba, nia dehan, sei koloka iha fatin sira hanesan GMT, Kampu Kulau Becora, Hotel Novu Turizmu nia oin besik kampu futeboll no mós iha Jogu tenis besik UNTL ne’eba, no iha mós fatin sira-ne’ebé identifika ona tanba falta semana ida hanesan ne’e mak ekipa tun ba terrenu hodi monta postu médiku sira-ne’e.

“Aumezmu tempu, ita mós monta ekipamentu médiku bázika, nune’e hodi atende ita-nia kliente sira. Tanba, ita preokupa liu mak iha jogo abertura ho enseramentu ne’e, tanba ida-ne’e jogadór ho alteta sira mai partisipa barak tebes,” nia hateten.

Kona ba ambulánsia, tuir nia, komisaun organizadora mós halo ona koordenasaun ho parseiru sira liuliu hanesan misaun Lepra apoiu ambulánsia ida (1) no mós klínika privadu sira mós sei apoiu, ne’ebé komisaun sei iha ambulansia másimu 15 no minimu mak 10.

Nia esplika, kona-ba orsamentu ne’ebé mak Governu aloka ba Ministériu Saúde hodi prepara ba jogu CPLP hamutuk rihun $30.

Notísia Relevante: Voluntáriu 200 tuir formasaun atu atende jogu CPLP

Jornalista : Felicidade Ximenes

Editór        : Cancio Ximenes