Top

SEKoop realiza enkontru koordenasaun hodi reforsa setór kooperativu

Sekretáriu Estadu Kooperativa, Arsénio Pereira, foto hamutuk ho parseiru dezenvolvimentu sira. Foto/Arminda Fonseca

DILI, 02 Jullu 2025 (TATOLI) – Sekretaria Estadu Kooperativa (SEKoop) realiza enkontru koordenasaun ho parseiru dezenvolvimentu kooperativa nian ne’ebé durante ne’e apoia Governu.

Sekretáriu Estadu Kooperativa, Arsénio Pereira, hateten enkontru ida-ne’e marka oportunidade signifikativa ida ba SEKoop, atu reflete ba viajen koletiva nu’udar progresu serbisu iha kooperativa nian.

Nia dehan SEKoop iha misaun atu foku ba setór kooperativu, tanba área ne’e iha papél krítiku ba dezenvolvimentu país hanesan deskreve iha Konstituisaun RDTL iha artigu 138 kona-ba setór kooperativa hanesan sosiuekonómiku ba dezenvolvimentu sustentavel.

Nia subliña katak Konstituisaun rekoñese koperativa sira nu’udar komponente xave, hamutuk ho setór públiku no privadu harii ekonomia ida ne’ebé forte no inkluzivu.

“Movimentu kooperativa la’ós buat foun iha Timor-Leste, maibé presiza renovadu, enerjia, forte liu, parseria, no investimentu estratu. Ita labele halo mesak, serbisu hamutuk ho ajénsia no instituisaun oioin. Ami rekoñese katak presiza halo buat barak liután”, nia dehan iha Garden Beach, Pantai Kelapa, ohin.

Tuir nia, kooperativa sira hala’o ona papél krusiál ida hodi hadi’a meiu subsisténsia sira iha komunidade rurál sira, liuhusi hakbiit juventude hodi fornese asesu ba finansa no merkadu ba agrikultór ki’ik.

“Ami fiar katak dezenvolvimentu setór kooperativa la’ós de’it prioridade ekonómika, maibé mós ida-ne’e ferramenta sira atu ajuda ita atinje objetivu sira dezenvolvimentu sustentavel nian, globalmente no kontribui signifikativamente ba ita-nia nasaun nia Gross Domestic Product”, hateten.

Liuhusi sorumutu ne’e atu identifika dezafiu no oportunidade sira no hametin espíritu kooperasaun kooperativa no haree susesu saida mak durante ne’e parseiru sira halo no dezafiu saida mak sira enftrenta hodi tau hamutuk planu ba futuru nian.

Governante ne’e dehan serbisu ho parseiru sira durante ne’e iha progresu tanba ho sira-nia apoia iha terrenu halo kooperativa barak ne’ebé mate agora moris fali.

Progresu ne’e mak antes ziste grupu kooprerativa 100-resin, maibé agora sa’e ba 245, tanba hetan apoiu husi parseiru sira. Ema ne’ebé envolve iha kooperativa besik rihun 39 no akumula ona kapitál hamutuk millaun $20,4.

Diretór Ezekutivu Mary MacKillop Today, Alito Baltazar, hateten sira-nia apoiu iha terrenu mak tulun grupu agrikultór feto sira, estabelese kooperativa rai no empresta osan, no halo kapasitasaun hamutuk ho SEKoop ba membru membru kooperativa sira.

Mary MacKillop Today tulun grupu kooperativa kréditu uniaun ida no multisetoriál lima iha munisípu Ermera, postu administrativu Railaku.

Nia dehan grupu kéditu uniaun ne’e semana kotuk entrega ofisialmente ona ba Governu atu jere mesak ona sira-nia an hafoin Mary Mackilop Today jere durante tinan hitu.

Ba grupu multisektorál sira halo produsaun ba produtu sira hanesan kafé, ortikultura, haki’ak animál, kuda baunila, loke kioske no seluk tan.

Kona-ba produsaun baunila nian sira-nia parte mós daudaun halo hela esforsu hamutuk ho International Labour Organization (ILO) hodi lori peritu sira husi Indonézia atu fó formasaun oinsá kuda, prosesa no fornese sertifikasaun ba iha produtu ne’e, katak iha kualifikasaun ka la’e atu esporta. Formasaun ne’e rasik sei hala’o iha Jullu ne’e.

“Sira-nia problema mak liga ba merkadu. Ita halo esforsu hamutuk ho SEKoop ho autoridade relevante sira oinsá tulun sira lori sira-nia produtu ne’e bá merkadu”, dehan.

Parseiru dezenvolvimentu ne’ebé partisipa iha sorumutu ne’e mak, Corporação Financeira Internacional, Care Internasionál, no seluk tan. Atividade ne’e realiza tanba SEKoop serbisu hamutuk ho Blue Ventures.

Notísia relevante: Grupu kooperativa hitu tuir treinamentu, transforma Bafo Kay Rala ba produtu finál

Jornalista: Arminda Fonseca

Editora: Maria Auxiliadora

Publisidade

Leave a Reply

Latest Post

error: Content is protected !!