DILI, 03 Jullu 2025 (TATOLI)-Arguidu SCG ba kazu Armandinho Lemos Soares ne’ebé lakon vida durante akontesimentu iha loron 18 Fevereiru 2024, iha área Bekuse nega akuzasaun Ministériu Públiku (MP) liuhusi audénsia julgamentu ne’ebé realiza husi Tribunál Judisiál Primeira Instansia Dili, ohin.
Arguidu ne’e desmente prova gravasaun vídio vijilánsia (CCTV-closed circuit television) ne’ebé aprezenta perante sesaun. Enkuantu arguidu na’in-lima sira seluk hanesan DG, MX, LVS, LA no HJ hili direitu nonok durante prosesu julgamentu.
Atu reforsa akuzasaun ne’e, ministériu públiku mos aprezenta testamuña na’in-rua iha julgamentu.
Sasin MLMdS ne’ebé momentu ne’eba hamutuk ho matebian haktuir ba tribunál katak haree arguidu SCG husi estrada sorin tuda konaba matebian nia inus tanba ho distansia ne’ebé besik, enkuantu DG tuda kona nia ulun no matebian nia ulun hodi halo sira monu husi motór.
Testamuña ne’e haktuir arguidu DG mak uza besi hodi baku no riba fatuk ba matebian nia ulun to’o hakotu iis.
Sasin dehan tan, bainhira nia hader mai, nia halai no soe hela motór.
Sasin seluk hanesan AS nu’udar aman husi matebian konta simu novidade husi viziñu ne’ebé bolu nia iha uma konaba nia-oan nia-mate.
Husi ne’e, imediatamente hakat ba estrada haree besik hodi tau liman ba Armandinho nia inus, matebian nia iis laiha ona. Nia dehan momentu ne’e haree ema hobur ona matebian nia isin.
Hanesan aman nia dehan triste tanba Armandinho nia vida hakotu liuhusi julgamentu husi arguidu sira ne’ebé suspeita nia oan liman-naruk.
Husi lakon ne’e, nia dehan ba tribunál katak matebian husik hela todan ba família tanba forma ona uma-kain (fen no oan ida).
Hafoin rona deklarasaun husi arguidu no sasin sira. Tribunál kolletivu deside marka fali prosesu ne’e ba loron 24 Jullu 2025 tuku 9:00 hodi kontinua rona sasin sira seluk.
Prova kronolojia ne’ebé aprezenta haktuir, iha loron akontesimentu maizumenus tuku 04.00 madrugada matebian Armandinho no MLMdS ho motór sai husi uma Bekuse bá aldeia Karrega Tiru atu bá Metiaut. Husi ne’e, sira na’in-rua tula bibi atu fa’an iha merkadu Taibesi.
Bainhira tama rotunda Taibesi, sira hetan tan kolega na’in-rua ho motór hodi sira la’o hamutuk bá Bekuse.
To’o iha Bekuse, bibi namek maka’as iha Armandinho nia liman laran hodi konvida joven no komunidade tuda sira, to’o matebian hakotu iis iha estrada laran. Enkuantu ninia kolega na’in-tolu seluk ho motorizada halai sees.
Situasaun ne’e, Polísia Nasionál Timor-Leste (PNTL) Eskudra Kristu Rei no parte investigadór sira tun kedas bá fatin akontesimentu.
Perante audiénsia, juiza prosesu lee akuzasaun ministériu públiku ne’ebé imputa ba arguidu sira ho krime ne’ebé previstu iha artigu 138 Kódigu Penál Timor-Leste. Artigu omisídiu simples ne’e haktuir ema ne’ebé halakon ema seluk nia vida, sei simu kastigu ho komarka tinan ualu to’o tinan-20 (Quem matar outra pessoa é punido com pena de prisão de 8 a 20 anos).
Julgamentu ne’e prezide husi juiz kolletivu Zulmira Auxiladora, Ivan Patrocino Suritai no Argentinho Nunes, Ministeriu Públiku reprezenta husi Prokuradór Renato Berenahak no arguidu sira hetan asistensia legál husi advogadu Pedro Aparicio.
Notísia relevante: Tribunál aplika medida koasaun AP ba arguidu envolve kazu omisídiu iha Becuse
Jornalista : Natalino Costa
Editora : Rita Almeida
