DILI, 04 Jullu 2025 (TATOLI)–Ministériu Finansa (MF) realiza sesaun traballu hodi entrega simbólikamente tetu dezagregadu ba instituisaun Estadu no kada ministériu, depoizde Konsellu Ministru aprova tetu orsamentál tinan fiskál 2026, iha loron 30 Juñu 2025, ho montante billaun $1,85.
Ministra Finansa, Santina Cardoso, hamutuk ho Vise-Ministra, Felícia Carvalho, mak distribui pakote fiskál ba órgaun soberanu hanesan Prezidénsia Repúblika, Parlamentu Nasional (PN), Governu no Tribunál.
Ministra hateten tetu fiskál ba tinan 2026 tun oituan kompara ho 2025, tanba ne’e nia husu ba jestór sira atu esforsu hodi elabora planu ho didi’ak tuir tetu ne’ebé simu no kumpre kalendáriu ne’ebé aprova ona husi Konsellu Ministru.
Nia salienta katak tetu ne’e sei prosede ba Komité Revizaun Orsamentu (KRO) molok aprezenta ba reuniaun Konsellu Ministru tuirmai atu hetan aprovasaun no sei submete ba Parlamentu Nasionál iha loron 01 Outubru 2025 tuir espíritu Lei Enkuadramentu Orsamentu nian.
“Ita hotu hatene Konsellu Ministru aprova ona tetu agregadu no dezagregadu proposta Orsamentu Jerál Estadu 2026 ho montante billaun $1,85. Husu imi halo análize didi’ak, nune’e bele implementa tetu tuir duni planu ne’ebé prepara ona ba Komité Revizaun Orsamentál”, governante ne’e dehan iha auditóriu Ministériu Finansa, ohin.
Iha biban ne’e, Ministériu Finansa mós aprezenta tetu orsamentál 2026 bazeia ba planu nasionál haat iha área importante mak dezenvolvimentu ekonómiku, dezenvolvimentu infraestrutura, dezenvolvimentu kapitál sosiál, no enkuadramentu sosiál.
Kritériu kalkulasaun subsetór OJE mak Administrasaun Sentrál nia saláriu no vensimentu, bens no serbisu, tranferénsia públika hamutuk billaun $1,42. Segurasa Sosiál nian saláriu no vensimentu, bens no serbisu no tranferénsia públika ne’ebé finansia husi reseita própria millaun $31.
Ba RAEOA nia saláriu no vensimentu, bens no serbisu no tranferénsia públika ne’ebé finansia husi jerénsia nian hamutuk millaun $20, kapitál menór no dezenvolvimentu hamutuk millaun $38.
Notísia relevante : https://tatoli.tl/2025/06/30/tetu-indikativu-ba-oje-2026-hamutuk-billaun-185/
Jornalista : Arminda Fonseca
Editora : Maria Auxiliadora
