SMAS Kovalima verifika ona dadus feto vulneravél hodi apoia $200
KOVALIMA, 04 Jullu 2025 (TATOLI)-Autoridade Kovalima liuhusi Servisu Munisipál Asaun Sosiál (SMAS) hahú halo verfikasaun dadus iha tereñu ba feto vulneravél atu fó apoia osan $ 200.
Razaun presiza halo verifikasaun dadus ne’ebé mak autoridade postu Zumalai submete ho intesaun atu hatene loloos feto vulneravél sira nia kondisaun.
“Atu fó apoia osan $ 200 ba feto vulneravél husi suku Ualu ne’ebé mai husi postu administrativu Zumalai, ha’u orienta ona funsionáriu halo asesmentu dadus feto vulneravél iha suku mak hanesan Fatuleto, Zulo, Tashilin no Raimea hodi halo entrevista direta”, Diretór Servisu Munisipál Asaun Sosiál (SMAS), Clementino Bere, relata ba TATOLI, iha Bairru Kosta ohin.
Hafoin simu dadus ne’e funsionáriu sira tun ba tereñu hodi halo asesmentu dadus atu hatene loloos dadus feto vulneravel ne’ebé submete mai nia kondisaun merese duni atu hetan apoia ka la’e ne’ebé horiseik ho ohin kontinua halo asesmentu ba dadus.
Regra atu hetan osan $ 200 ba feto vulneravél ho nia kondisaun mak hanesan feto ne’ebé abandona husi nia katuas-oan no nia-oan eskola hodi haree nia kondisaun loos merese atu hetan duni.
Bazeia ba planu asaun anuál ne’ebé mak husi servisu munisipál asaun sosial kada feto vulneravél fó apoiu osan $200, nune’e ba feto vulneravél 21 ne’e ho nia orsamentu hamutuk $4,200.
Tuir planu servisu munisipál fó apoiu osan ba feto vulneravél ba postu administrativu hitu, maibé apoia ho fazeadamente tanba kestaun orsamentu ne’ebé iha 2024 ne’e fó apoiu iha postu Suai hamutuk 12 no iha 2025 apoia ba na’in 21 iha Zumalai.
Tuir planu iha 2026 ne’e sei fó apoia osan $200 ba feto vulneavél iha postu administrativu Fatumea, Munisípiu Kovalima.
Governu sentrál aloka OJE 2025 mai Kovalima hamutuk $8,293.634 husi orsamentu ne’e aloka ba Servisu munisipál Asaun Sosiál hamutuk $153.497.00.
Enkuantu Proposta OJE 2026 ne’e, Servisu Munisipál Asaun sosiál prevee tan orsamentu hamutuk $5.046,222 sei fahe ba saláriu vensimentu $85,632, bens servisu $50,490, transferénsia Públika $63,200 no kapitál menór $346.900.
Jornalista:Celestina Teles
Editór:Florencio Miranda Ximenes
