Ekipa Task-Force Bobonaru planeia halo operasaun ba asu husik livre
BOBONARU, 07 Jullu 2025 (TATOLI)—Ekipa Task-Force ba Asuntu Prevensaun Vírus Raiva iha Munisípiu Bobonaru, planeia halo operasaun ba asu ne’ebé husik livre iha aldeia, suku no espasu públiku ho objetivu atu prevene no kombate tranzmisaun vírus raiva.
Koordenadór Pilár I Task-Force ba Asuntu Prevensaun Vírus Raiva, Augusto Caetano, informa operasaun ne’e bazeia ba sirkulár ne’ebé Governu fó-sai.
Nia haktuir katak antes ne’e ekipa Task-Force halo ona advokasia prevensaun vírus raiva ba komunidade iha área risku hanesan Suku Holsa, Saburai no Suku Raerobo, Postu Administrativu Atabae.
Aleinde ne’e, ekipa Task-Force mós halo ona sosializasaun iha merkadu hodi konxiensializa haki’ak-na’in sira atu sulan asu no lori bá simu vasina iha postu vasinasaun ne’ebé estabelese iha edifísiu Diresaun Servisu Munisipál Agrikultura Autoridade Munisípiu Bobonaru.
Notísia relevante: Komunidade solisita Autoridade Bobonaru halo operasaun ba asu husik livre
Administradór Postu Administrativu Maliana ne’e afirma bainhira haki’ak-na’in sira la kumpre, ekipa operasaun sei aplika sansaun ne’ebé forte tanba vírus raiva perigu ba ema-nia vida.
“Ami sei halo operasaun ba asu ne’ebé mak bulak ona no ba asu ne’ebé seidauk vasina. Na’in ba asu la kesi sira-nia asu, ami sei oho. Se la oho, sei fó implikasaun ba ema-nia vida,” nia relasa.
Entretantu, II Vise-Prezidente Ekipa Task-Force ba Asuntu Prevensaun Raiva Munisípiu Bobonaru, Gil Bernardo Vicente, tenik hahú husi Janeiru to’o 06 Juñu 2025 ne’e Ekipa Vijilánsia Epidiomolojia Servisu Saúde Munisípiu Bobonaru rejista katak ema-na’in 184 ne’ebé asu tata maioria simu hotu ona vasina.
“Pasiente hirak-ne’e kompostu husi mane 111 no feto 73. Kazu ne’e barak liu akontese iha Postu Administrativu Maliana Vila,” nia tenik.
Iha fulan kotuk liubá, Munisípiu Bobonaru rejista ema na’in-rua mate tanba infetadu vírus no la simu vasina. Enkuantu, asu ne’ebé tata ema iha 13 mak konfirmadu pozitivu Vírus Raiva.
Jornalista: Sergio da Cruz
Editór: Xisto Freitas da Piedade
