DILI, 07 Jullu 2025 (TATOLI) – Timoroan sira iha diáspora ne’ebé halibur aan iha ETAP (East Timorese Association Peterborough) aprezenta gastronomia Timor-Leste nian hanesan katupa, ai-farina, fehuk-midar, talas, budu-tasi no seluktan no mós sentru informasaun kona-ba país ne’e, iha festivál primeira edisaun ‘PALOP E LUSO FEST 25’, iha sidade Peterborough.
Festivál ida-ne’e halibur rai ualu ne’ebé ko’alia lian ofisiál portugés hanesan Portugal, Timor-Leste, Angola, Brazil, São Tomé e Prinsipe, Kabu Verde, Mozambike no Giné-Bisau.
“Durante loron rua nia laran, sidade Peterborough (sei) sai fatin animasaun no entreteinamentu husi rai ualu ne’ebé ko’alia lian Portugés”, Mayor of Peterborough Councillor, Jude Fox hateten, iha ámbitu abertura festivál ne’e, tuir komunikadu ida husi Peterborough, ba TATOLI, ohin.
Enkuantu, Carla Marques nu’udar fundadora ba festivál ida-ne’e hateten, “Prezensa rai ualu ne’ebé ko’alia lian ofisiál portugés halo festivál ne’e signifikadu tebes tanba hatudu programa mesak furak de’it hanesan múzika, hahan, artezenatu, dansa, istória, Dj’s, prestasaun servisu komunitaria no seluktan. Hein katak festivál ida-ne’e kontinua halo tinan-tinan iha sidade Peterbrorugh”.
Marka prezensa iha festivál ida-ne’e Embaixadór Timor-Leste iha Reinu Unidu, João Paulo Rangel.
“Sente laran ksolok tebes haree komunidade Timoroan halibur hamutuk iha festivál ida-ne’e hodi promove Timor-Leste. Hodi Estadu no povu Timor-Leste hakarak hato’o apresiasaun ba esforsu tomak no kreatividade oioin husi komunidadi Timoroan hotu iha Peterborough ne’ebé halo parte iha festivál ida ne’ebé furak tebes,” diplomata timoroan ne’e apresia.
Prezidente ETAP, Celso Oliveira hato’o agradesimentu ba funsionáriu, voluntáriu no membru komunidade hotu ne’ebé marka prezensa iha festivál ida-ne’e.
“Hodi ETAP nia naran hakarak hato’o obrigadu ua’in ba staff no voluntariu sira ne’ebé halo ona esforsu oioin hodi realiza gastronomia, kultura no informasaun kona-ba Timór iha festivál ida-ne’e”.
Entretantu, alende gastronomia, iha festivál ida-ne’e aprezenta mós dansa no múzika tradisionál no kultura Timor-Leste husi grupu dansa LORIKU, husi Mozambike Grupu Xipane-Pane, husi Guiné-Bisau, Angola, husi Brazil DG Samba Dance Show Karnaval, husi São Tomé Prinsipé grupu dansa tradisionál STP, husi Kabu Verde grupu dansa tradisionál Batukaderas Di Reino Unido no ikusliu grupu Fado husi Portugal.
Molok hahú serimónia ne’e, rai ida-ida toka uluk inu nasionál. No, iha ámbitu atividade ne’e, partisipante sira kontente tanba bele konsumu hahán tradisionál, hemu serveza no hetan divertimentu.
Festivál primeira edisaun PALOP E LUSO FEST 25 realiza durante loron rua – iha sábadu no domingu (05-06) Jullu, tinan ne’e.
Notísia relevante:ETAP promove istória no kultura Timór iha Muzeu Peterborough, Reinu Unidu
TATOLI
