DILI, 07 Jullu 2025 (TATOLI)–Governu liuhusi Ministériu Asuntu Kombatente no Libertasaun Nasionál (MAKLN) no Komisaun Konsellu kombatente Libertasaun Nasionál (CCLN, sigla portugés), Segunda ne’e, lansa fatuk dahuluk ba konstrusaun edifísiu banku veteranu ho naran ‘Banco do Nosso Futuro’ iha Kolmera.
“Ohin loron ne’e importante tebes halo lansamentu ba Banco do Nosso Futuro, veteranu. Banku ne’e hamriik hodi atende veteranu sira ba kréditu hodi halo atividade sira,” Prezidente CCLN, Vidal de Jesus ‘Riak Leman’ informa ba jornalista sira, iha fatin estabelesimentu banku, iha Kolmera.
Ho inisiativa ne’e, veteranu sira iha futuru bele halo ona programa oinoin husi fundu kontributivu veteranu.
“Bainhira funsiona, dahuluk sei loke área pekuária tanba aprosima ona ho Ministériu Agrikultura Peska,” nia akresenta.
Notísia relevante : Investimentu ida husi fundu kombatente mak banku ba ita-nia futuru
Nia relata, daudaun ne’e fundu kontributivu ne’ebé veteranu hamutuk 27.600-resin halibur hetan ona millaun $50 ho veteranu hamutuk 27.600-resin.
Kustu ba konstrusaun Banco do Nosso Futuro hamutuk millaun $5, husi Companhia Nacional dos Combatentes e Veteranos, Sociedade Anonima (CNCV, SA) Joint Venture ho Caria Timor-Leste (CTL) ho durasaun konstrusaun to’o tinan-ida, hahú fulan ne’e.
Ministru Asuntu Kombatente Libertasaun Nasionál, Gil da Costa Monteiro ‘Oan Soru’, hateten, ohin hotu-hotu prezente iha serimónia ne’e hodi sai testamuña nune’e nia konsidera eventu ne’e importante.
“Lansamentu ida-ne’e atu fó garantia ida banku ba futuru. Ohin ha’u lori veteranu sira-nia naran hodi hato’o agradese wain ba ita-boot sira-nia prezensa, ba pasajen badak ne’ebé ohin ne’e la’ós fasil maibé difísil tebes maibé labele hanoin difísil ne’e tanba se ita hanoin hanesan ne’e serbisu hotu la la’o ona,” nia tenik.
Antes ne’e, veteranu sira fó sujestaun tolu ba Governu hanesan harii banku própriu, ospitál no harii universidade.
“Maibé ohin hotu-hotu iha ne’e sai ona testamuña ba lansamentu fatuk dahuluk, ba sujestaun ne’ebé husi inan-aman sir-ian katak harii Banku Nasionál ba futuru veteranu iha rai ida-ne’e,” Governante ne’e tenik.
Diretór Ezekutivu CNCV, Domingos do Santos Sequeira, hateten, posivelmente molok tinan-ida projetu ne’e bele ramata, nune’e bele fó mensajen di’ak ba veteranu sira ne’ebé ko’a osan.
“Pro-projetu ne’e iha faze rua, ida empreza kaer ne’e ba konstrusaun de’it no parte interiór husi banku ne’e empreza seluk mak kaer,” nia hato’o.
Materiál konstrusaun balun sosa iha Dili, enkuantu besi ho semente mak husi rai-li’ur ne’ebé di’ak no sufisiente atu halais prosesu.
Kriasaun fundu kontribuitivu veteranu, bazeia ba dekretu-lei númeru 8/2020, alterasaun ba dekretu-lei númeru 15/2008 ba pensaun liuhusi Konsellu Ministru, promulgadu husi Prezidente Repúblika iha 19 Marsu 2020, hodi kria Gabinete Apoiu Programa Fundu Investimentu Veteranu Timor-Leste ne’ebé despaisu ne’e deside husi númeru 01/MAKLN SEAKLN/I/2020 tau-matan ba fundu investimentu.
Eventu ne’e partisipa husi Vise-Primeiru, Ministru Ambiente Ekonomia Francisco Kalbuadi Lay, Governadór Banku Centrál Timor-Leste Helder Lopes, Reprezenta Banku Mandiri, Vise-Presidente Banku Nasionál Komérsiu Timor-Leste, Sekretáriu Estadu Terras no Prioridade, Komandante Jerál Polísia Nasionál Timor-Leste, nomós Reprezentante husi CCLN iha Munisípiu sira inklui líder lokál iha Kolmera.
Jornalista : Osória Marques
Editora : Julia Chatarina
