DILI, 20 Marsu 2025 (TATOLI)-Konsellu Kombatente Libertasaun Nasionál (CCLN, sigla portugés) sei investe fundu husi kombatente ba banku ho naran banco do nosso futuro (banku ba ita-nia futuru) no programa sira seluk hanesan agrikultura, pekuária, peska no seluktan.
“Ami mós halo hela kooperasaun ho Telkomcel ne’ebé ho nia tore iha fatin-fatin, depois ida mak atu estabelese seguransa sivil ne’ebé Kompañia Nasionál Kombatente Veteranu (KNKV-S.A) mak sei tau matan”, Prezidente CCLN, Vidal de Jesus Riak Leman, ba TATOLI iha ninia kna’ar fatin Komoro, kinta ne’e.
Notísia relevante: CCLN lansa ofisina CNCV, SA, fundu veteranu
Nia dehan investimentu seluk ne’ebé KNKV nia la’o hela mak ofisina. Enkuantu, estabelesimentu pesoál seguransa sivil hodi oferese ba banku sira hanesan Mandiri, BRI no banku ne’ebé ninian sukursál iha munisípiu, sei iha faze negosiasaun.
Seluk fali mak servisu limpeza-nian no sei loke karpintária, liuliu halo kaixaun no mós prepara konjeladór ba veteranu sira.
Investimentu ne’ebé hetan ona aprovasaun husi konsellu nasionál mak ofisina no harii banku. Tanba ne’e, fundu ne’ebé aloka ba dezeñu no konstrusaun banku iha área Kolmera (antigu dolog) hamutuk $80.000.
“Dezeñu halo ona no aprezenta ona ba Ministériu Obras Públika depois mak halo konstrusaun”, katak Riak Leman.
Riak Leman dehan, banku ho naran banco do nosso futuro, hetan ona aprovasaun husi Banku Sentrál ne’e sei garante moris di’ak ba veteranu ho ninian jerasaun iha futuru.
“Banku ne’e sei lori osan ba buka osan, planu mak loke banku provizóriu iha resintu ida-ne’e iha Maiu ka Juñu nia-laran”, afirma.
Nia informa, produsaun atu asesu mákina kaixa automátika (ATM) prodús ona iha Portugál tuir orientasaun husi banku sentrál, no mákina referida sei koloka iha munisípiu sira bainhira estabelese sukursál.
Notísia relevante: Fundu kontributivu 2024 atinje ona milliaun $48.98-resin
Jornalista : Osória Marques
Editora : Rita Almeida
