DILI, 13 Marsu 2025 (TATOLI) – Kompaña Nasionál ba Kombatente no Veteranu (CNCV, SA), liuhusi Konsellu Kombatente no Libertasaun Nasionál (CCLN, sigla portugéz) lansa ofisina foun fundu veteranu, ne’ebé nu’udar atividade negósiu ida husi gabinete fundu investimentu veteranu.
Ofisina foun ne’e lansa no inaugura direta husi Ministru Asuntu Kombatente Libertasaun Nasionál (MAKLN), Gil Monteiro“Oan-Soru” iha Manleuana, Dili, kuarta ne’e.
Iha intervensaun, Ministru MACLN, agradese ba CNCV,AS tanba hahú halo daudaun prosesu jestaun fundu veteranu nian ne’ebé antes ne’e Governu rai hela iha Banku Nasionál Komérsiu Timor-Leste (BNCTL).
“Apartir ohin loron, lori ha’u nia naran agradese ba CNCV, SA tanba prosesu hahú, maibé husu atu isin-moris, husu atu la’o lais no husu atu toba labele dukur liu”, Ministru Gil Monteiro “Oan-Soru”, hateten iha diskursu lansamentu CNC, SA, iha Manleuana, Dili.
Investimentu ofisina ida-ne’e kuaze tinan tolu hahú husi tinan-2023 to’o 2025, konstrusaun ofisina ida-ne’e husi inísiu to’o ohin loron kuaze gastus $28 mil, no orsamentu ne’e rasik mai husi kombatente sira-nia konribuisaun hamutuk hodi halo investimentu ba rai ida-ne’e.
“Investimentu ba ofisina ida-ne’e mós lori tempu-naruk kuaze tinan tolu, hahú 2023. Totál kustu ne’ebé halo mai investimentu ida-ne’e, to’o ohin loron, ne’ebé ita hamutuk iha ne’e, gastus ne’e kuaze $28 mil ona. Ne’e nu’udar pasu primeiru husi mehi boot, husi ita-nia aman sira, atu lori osan ne’ebé hosi kombatente sira tau hamutuk, atu halo investimentu ba rai ida-ne’e”, Diretór Ezekutivu CNCV, SA, Domingos Santos Caero, hateten iha ninia diskursu.
CNCV, SA mós halo parseiru prinsipál lubuk ida mak Governu no parte seluk tan hanesan, Banku Mandiri, Telkomsel, I.P. Serve, Dili Institute of Technology (DIT) no seluktan.
Entretantu tuir Prezidente Konsellu Administrasaun CCLN, Vidal de Jesus “Riak-Leman”, iha ninia diskursu hateten, atividade lansamentu ida-ne’e, CNCV mós presiza kooperasaun ho Governu atu servisu hamutuk tanba Governu mak odamatan prinsipál ba fundu.
“Ohin, ita inaugura ita-nia ofisina iha ne’e, CNCV presiza liu-liu mak ita-nia Governu. Governu hanesan odamatan prinsipál bá fundu, no bá CNCV, kompaña veteranu nian”, nia sujere.
Aleinde ne’e mós Kombatete Veteranu sira mós sei halo kooperasaun ho Ministériu Justisa atu halo despaxu ba Diretór Terras no Propriedades, bá mós Diretór Terras no Kadastrais atu sukat rai balun hodi halo investimentu iha área pekuária no agrikultura.
“No iha momentu ne’ebá, ami koalia ho sua-eselénsia señor Ministru Justisa, halo despaxu ida bá diretór terras no propriedades, bá mós diretór terras no kadastrais, ami bá sukat tiha ona iha Manufahi, rai Weberek ne’ebá, hetan 200 hektáres. Tuir fali ida-ne’e, ami bá sukat tan iha entre Laleia-Manatuto, kala iha 50 ka 60 hektáres ida. Bá tan Lospalos, sukat iha ne’ebá hetan 600 hektáres. Ne’e atu halo investimentu kona-bá pekuária, agrikultura,” nia aumenta.
“No, veteranu nia osan ne’e komesa 2020 mai to’o agora, no aban-bainrua, aprova tan sira ne’ebé rejístadu iha segundu rejistu tinan 2009, sira ne’e nia osan koa tan $30 kada-fulan, fundu veteranus nian ne’e sei aumenta tan. Dala-ruma, fulan-ida, bele tama millaun ida resin mós iha. Tanba ne’e maka veternu ninia fundu ne’ebé ké kria, osan ne’ebé iha, atu halo investimentu” Prezidente CCLN énfaze.
Entretantu, seremónia lansamentu ofisina foun ne’e hetan partisipasaun másimu husi Ministru Asuntus Kombatentes no Libertasaun Nasionál (MACLN), Prezidente Konsellu Administrasaun CCLN, Vidal de Jesus “Riak-Leman”, Diretór Ezekutivu CNCV, SA, Domingos Santos Caero, membru Governu balun, parseiru sira, padre, no konvidadu sira.
Jornalista: Alexandra da Costa
Editór: Rafael Ximenes de A. Belo
