DILI, 07 Jullu 2025 (TATOLI)–Ministériu Edukasaun Timor-Leste no Brazíl halo kooperasaun hodi mellora kualidade ensinu sekundáriu tékniku vokasionál iha futuru.
Nune’e, parte rua asina nota hodi formaliza kooperasaun ba formasaun profisionál ba foin-sa’e sira iha sistema edukativu ne’ebé aliña ho nesesidade merkadu traballu.
“Ministériu Edukasaun no Brazíl asina nota entendimentu ba kooperasaun iha parte tékniku nian, ne’ebé tempu badak ita sei hetan profesór na’in-haat maihusi Brazíl atu halo diagnóstiku di’ak liu ba eskola tékniku vokasionál, liuliu ba profesór sira,” Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, informa ba jornalista sira, iha sala konferénsia Ministériu Edukasaun (ME), Vila-Verde, Sesta (04/07).
Liuhusi diagnóstiku sei sai referénsia atu nune’e ba oin bele halo formasaun di’ak liután ba manorin sira.
“Koopersaun ida-ne’e halo ona iha tinan kotuk, ho profesór sira husi Brazíl na’in-11 hodi fó formasaun ba eskola tékniku vokasionál sira ne’ebé sai alvu ba sira, ne’ebé Ministériu Edukasaun mak deside. Sira fó formasaun durante fulan-neen iha eskola sira iha territóriu,” nia akresenta.
Notísia relevante : ME planeia ona atu agrupa eskola tékniku vokasionál iha Dili laran
ME Timor-Leste nia responsabilidade atu transfere teknolojia hodi moderniza sistema informasaun iha Instituto Nacional de Formação de Docentes e Profissionais da Educação de Timor-Leste (INFORDEPE) no Diresaun Nasionál Infraestrutura no Edukativu.
Aleinde ne’e, husi parte Brazíl sei apoia implementasaun estabelesimentu integradu Eskola Sekundáriu Tékniku Vokasionál Bekora no sei dezenvolve kurríkulu ba kursu kafeikultura iha Ermera no Likisá.
Biban ne’e, Governu Timor agradese ba Governu Brazileiru, liuliu Embaixada iha Dili, Ajénsia Kooperasaun Brazileiru no Ministériu Edukasaun Brazíl, ba susesu projetu pilotu 2024, ne’ebé iha faze inisiál, ema na’in-104 mak hetan ona formasaun iha kontabilidade, programasaun, konstrusaun sivíl no área estratéjiku sira seluk.
Iha fatin hanesan, Ministra Konselleira Negósiu Embaixada Brazíl iha Timor-Leste, Rita de Cássia Lott Marques, hateten, sesaun asinatura ne’e atu kontinua projetu pilotu ne’ebé halo ona iha tinan kotuk.
“Kooperasaun ne’e atu hadi’a eskola sekundária téknika vokasionál sira, entaun ida-ne’e maka pasu daruak iha projetu ida-ne’e ne’ebé ami avansa ho entuziazmu maka’as tebes,” nia dehan.
Rita de Cássia sente kontente tanba bele kontinua projetu ne’ebé atu valoriza edukasaun, tanba edukasaun importante tebes ba nasaun.
“Iha ona kooperasaun anteriór, oinsá atu ajusta projetu ida-ne’e atubele sai utíl liután, tuir realidade timoroan, kona-ba saida mak presiza ba eskola tékniku-vokasionál sira, entaun halo diagnóstiku ida-ne’e no ida-ne’e sei hasoru dezafiu foun sira,” nia tenik.
Ekipa husi Brazíl sei halo diagnóstiku hodi buka solusaun ba kestaun sira ne’ebé parte rua sei define, ne’ebé sai aspetu importante liu ba valorizasaun eskola.
Jornalista : Osória Marques
Editora : Julia Chatarina
