DILI, 07 Jullu 2025 (TATOLI)—Ministru Edukasaun interinu no atuál Sekretáriu Estadu Ensinu Sekundáriu Jerál no Eninsu Tékniku Vokasionál, Domingos Lopes Lemos, motiva estudante sira atu estuda hodi bele dezenvolve liután edukasaun iha futuru.
“Apela ba estudante no profesór hotu katak loron 14 Jullu agora, tama ona ba ezame períodu daruak nian. Tanba ne’e, husu ba estudante sira hotu atu mantein kalma iha ita-boot sira-nia fatin no mantein estuda atubele hetan rezultadu di’ak iha ezame períodu daruak. Dezenvolvimentu edukasaun futuru iha estudante presiza estuda,” Ministru Edukasaun interinu hato’o iha edifísiu Ministériu Edukasaun (ME), Vila-Verde, Segunda ne’e.
Governante ne’e husu mós ba manorin atu akompaña estudante sira durante semana hirak nia laran to’o iha ezame períodu ida-ne’e.
“Husu hotu-hotu tenke konsentra ona ba ezame, tanba ezame ne’e mak sai sasukat ida ba manorin ida katak, manorin ne’e durante períodu ida nia laran hanorin iha saladeaula ne’e pro-ativu ka lae. Tanba rezultadu ida hatudu katak, manorin ne’e durante sériu duni iha prosesu ensinu iha saladeaula, ida-ne’e presiza hatene no manorin tenke akompaña estudante nia prosesa aprendizajen loron-loron,” nia fó hanoin.
Notísia relevante : Presiza dezenvolve edukasaun inkluzivu ba EhD iha Timor-Leste
Iha fatin seluk, Diretór Eskola Ensinu Báziku Sentrál (EBC, sigla portugés) 10 Dezembru, Calistro A. Guterres, hateten, daudaun ne’e parte eskola preparadu hodi hasoru ezame segundu períodu 2025, ne’ebé iha semana kotuk manorin sira halo ona elaborasaun ba pontu ezame.
“Pontu ezame ba segundu períodu ne’e ba klase 9 ano, iha númeru 50 bazeia ba ezame nasionál, ba 7 ano no 8 ano normalmente númeru 35 ba segundu períodu. Tamba ne’e, ha’u bele hateten 95 porsentu ne’e pontus ezame preparadu,” Diretór Eskola relata.
Diretór ne’e dehan tan, kuríkulu ensinu baziku iha matéria 11, nune’e molok tama ba ezame, manorin sira hanorin bazeia ba tópiku no sub-tópiku.
“Ami mos iha enkontru ho Konsellu Profesór, atu profesór disiplina ida-idak bele aprezenta sira-nia unidade, atu unidade ne’ebé seidauk hotu bele iha aula reforsa, aula reforsa ne’e ba manorin sira ne’ebé nia matéria seidauk hotu, entaun tenke aula reforsa iha sábadu atu atinje unidade ne’ebé iha,” nia katak.
Aleinde ne’e, kona-ba manorin iha eskola referida sufisiente maibé tinan oin reforma obrigatóriu.
“Ha’u hanoin daudaun ne’e iha manorin na’in lima mak tama ona lista reforma atu submete bá Ministeriu Edukasaun no na’in-tolu mak ho moras prolongada, entaun hamutuk na’in-hitu,” nia akresenta.
Eskola ne’e iha saladeaula hamutuk 24 mak funsiona ba estudante sira uza, inklui karteira eskolár (meza no kadeira) ne’ebé konsideradu sufisiente.
“Meza no kadeira maski ho kondisaun ladún dignu, maibé iha kondisaun balun di’ak atu responde ba nesesidade estudante sira,” nia tenik.
Eskola EBC 10 Dezembru iha profesór hamutuk na’in-47, kompostu husi feto na’in-16 no mane 31, ho estudante hamutuk na’in-863.
Jornalista : Osória Marques
Editora : Julia Chatarina
