PNTL detein ona suspeitu ba Peregrina da Conceição nia mate
DILI, 07 Jullu 2025 (TATOLI)-Portavós Komandu Polísia Nasionál Timor-Leste (PNTL), Suprintendente Polísia João Belo dos Reis, informa PNTL detein ona suspeitu ho inisial MD ba kazu Peregrina da Conceição nia mate iha área Jakarta II Ainaru.
Nia dehan polísia identifika suspeitu iha área Don Aleixo no agora daudaun detein iha sala detensaun eskuadra PNTL Don Aleixo. Detensaun ne’e akontese tanba kolaborasaun entre ekipa sira hanesan servisu informasaun polísia, servisu investigasaun kriminál, komandu munisípiu Ainaru no Likisá.
Nia haktuir parte komandu munisípiu Ainaru simu informasaun husi komunidade iha área Jakarta II, iha loron 6 fulan-Jullu 2025, tuku 11.00, tanba hetan mate-isin, feto ho idade 23 ho naran kompletu Peregrina da Conceição.
Vítima ho naran istimadu Amina ne’e laiha ona iis bainhira parte polísia halo identifikasaun iha fatin akontesimentu. Faktu seluk ne’ebé rekolla mak motorizada-ida.
Identidade seluk husi vítima mak maihusi suku Asumanu, postu administrativu Likisá Villa, munisípiu Likisá. Hafoin identifikasaun, komandu Ainaru halo kedas komunikasaun ho parte ministériu públika hodi transporta mate-isin mai Ospitál Nasionál Guido Valadares, ba prosesu autopsia.
Nia afirma kazu ne’e seidauk hatene kauza loloos, tanba sei kontinua ho prosesu investigasaun.
“Kronolojia kazu omesídiu seidauk hatene loloos, tanba sei iha prosesu investigasaun. Tanba ne’e, ha’u labele ko’alia iha-ne’e, tanba hola parte iha segredu justisa no agora daudaun prosesu investigasaun la’o hela”, nia relata.
Nia realsa prosesu autopsia maka bele hatene kauza. “Prosesu autopsia sei termina katak mate ne’e kauza husi oho ka ema baku, investigasaun sei la’o hela no ema ne’ebe ita deskonfia envolve iha kazu ne’e ita asegura ona, suspeitu sei kumpre iha sela detensaun durante oras 72 nia laran hafoin sei aprezenta ba ministériu públiku hodi submete ba prosesu judisiáriu”, nia konklui.
Notísia relevante: Suspeitu ba kazu omisídiu iha Bene-Ufe kumpre prizaun preventiva
Jornalista : Natalino Costa
Editora : Rita Almeida
