SMAPPF Vikeke apoiu ekipamentu agrikultura no ai-moruk ba grupu tolu iha Luka
VIKEKE, 07 Jullu 2025 (TATOLI)–Servisu Ministériu Agrikultura Peska, Pekuária no Floresta (SMAPPF) Munisípiu Vikeke, segunda ne’e, apoia fasilidade agrikultura no ai-moruk antrakól ba grupu agrikultura tolu iha Suku Luka, Postu Administrativu Vikeke Vila, Munisípiu Vikeke.
Diretór Servisu MAPPF Munisípiu Vikeke, Olívio Soares Freitas, haktuir apoia ne’ebé SMAPPF Vikeke oferese ba agrikultór sira-ne’e kompostu husi regadór (sprayer) no ai-moruk antrakól falun 20 hodi uza ba prevensaun peste ne’ebé atake hare.
“Durante ne’e, agrikultór sira preokupa dehan laiha sprayer no laiha ai-moruk, tan ne’e mak ohin ita apoia sprayer no ai-moruk antrakól ba sira atu agrikultór sira uza ba sira-nia natar atu prevene peste atake hare,” Olívio Soares Freitas ba TATOLI, iha Suku Luka.
Notísia relevante: Autoridade Uaitame husu MAPPF apoiu ai-moruk peste atake hare
Olívio dehan, SMAPPF Vikeke kontinua akompaña agrikultór sira ba peste atake hare hanesan ai-moruk antrakól, maibé ai-moruk pestisida to’o agora seidauk iha.
“Ita kontinua uza ai-moruk ne’ebé iha hanesan antrakól. Antrakól ne’e ita uza hanesan halo kurativu de’it. Maibé, atu hamate peste mak pestisida. Agora, ita-nia ai-moruk ne’e seidauk iha hodi fahe ba agrikultór sira,” nia hato’o.
Iha fatin hanesan, Reprezenta Grupu Ai-Manas Rai, Leoneto Gomes Pereira, hato’o agradesimentu ba SMAPPF Vikeke ne’ebé apoia ona fasilidade agrikultura nian no ai-moruk ba grupu tolu ba prevensaun peste ne’ebé atake hare.
“Ami hato’o agradesimentu ba SMAPPF tanba apoia ona ekipamentu no ai-moruk ba ami maski ho kuantidade ne’ebé ki’ik, maibé jauda ona ami. Durante ne’e, ami preokupa loos ba ai-moruk,” nia hato’o.
Ai-moruk antrakól hamutuk falun 20 ho totál 600 grama, ne’ebé atu halo prevensaun ba peste (ular) ne’ebé estraga hare no produtu sira seluk.
Iha distribuisaun fasilidade no ai-moruk ne’e, oferese direta husi Diretór SMAPPF Vikeke, Reprezentante Prezidente Autoridade Munisípiu Vikeke, autoridade seguransa, autoridade lokál no komunidade Suku Luka.
Jornalista: Vitorino Lopez da Costa
Editór : Xisto Freitas da Piedade
