DILI, 07 Jullu 2025 (TATOLI)–Universidade Nasionál Timor-Lorosa’e (UNTL) ho parseria Univercidade Porto iha Portugal, Segunda ne’e, lansa ona introdusaun ba kursu lian Alemaña ba estudante sira durante semana ida.
“Abertura ba kursu lian Alemaña ohin ne’e nu’udar kooperasaun entre Universidade Nasionál Timor-Leste ho Uniaun Europeia, ne’ebé objetivu husi formasaun iha lian ne’e atu fó oportunidade ba ita-nia joven sira atu estuda iha universidade Alemaña iha futuru, tanba iha oportunidade barak ba bolsa estudu maibé ezijénsia mak tenke hatene lian Alemaña,” Vise-Reitór Pós-Graduadu no Peskiza, Afonso de Almeida informa ba Agência TATOLI, iha UNTL.
Notísia relevante : UNTL prepara finalista 1.700 ba graduasaun iha Jullu
Pro-Reitór dehan, bolsa estudu ne’ebé sei oferese ba UNTL iha área enjeñaria, bainhira estudante sira iha vontade atu apreende lian Alemaña.
“Kursu ne’e nia durasaun semana ida, maibé kursu ne’e sei kontinua ba maluk sira ne’ebé karik iha interese. Alemaña nu’udar nasaun dezenvolvidu iha área enjeñaria. Tanba ne’e joven sira bele apreende karik hetan bolsa estudu ne’e,” nia akresenta.
Profesór Alemaña iha Universidade Porto hanesan formadór, Nicolas Neef, hateten, kursu ne’e sei aprezenta lian Alemaña.
“Ami oferese kursu online gratuita ba auto-estudu”.
Formanda Betelia Leço Loco, admite foin ba dahuluk apreende lian Alemaña, maski sente susar maibé ho esforsu bele ultrapasa hodi atinje meta sira.
“Ha’u-nia objetivu maka atu apreende lian Alemaña no ha’u bele hetan oportunidade atu ko’alia buat foun ruma,” nia katak.
Jornalista : Osória Marques
Editora : Julia Chatarina
