DILI, 08 Jullu 2025 (TATOLI)—Reitór Universidade Nasionál Timor Lorosa’e (UNTL), João Soares Martins hateten adezaun Timor-Leste ba Asosiasaun Nasaun Sudeste Aziátiku (ASEAN-sigla ingleza) sei fó vantajen boot ba nasaun ne’e.
“Importante tebes-tebes para ita bele hola-parte iha komunidade sudeste aziátiku. Ida-ne’e vantajen boot ida ba Timor-Leste. Se ita hola-parte iha ASEAN, kerdizer ita iha asesu ba sira-nia merkadu ekonómia. Maski nune’e, ita mak tenke prepara-aan no Governu mós presiza investe maka’as iha rekursu umanu, nune’e ita bele kompete ho ita-nia maluk sira iha ASEAN,” Reitór UNTL hateten ba TATOLI iha salaun Katedrál Dili, tersa ne’e.
Notísia relevante: Governu análize progresu Timor-Leste iha prosesu adezaun ba akordu servisu ASEAN
João Martins dehan ASEAN nia populasaun iha territóriu kuaze millaun atus-hitu (700) bele benefisiadu iha Timor-Leste nia adezaun tanba bele asesu produtu husi nasaun ne’e.
“Ita hatene katak populasaun ASEAN kuaze millaun 700. Ida-ne’e ita serbisu mak ita bele fa’an ita-nia sasán ba sira no ne’e vantajen di’ak mai Timor. Nu-entantu, atu to’o bá iha-ne’ebá, presiza serbisu maka’as para ita-nia sasán sira ita atu esporta ne’e tenke kumpre rekizitu ne’ebé mak sira ezije,” Reitór ne’e subliña.
Nia tenik, ensinu superiór nia papél mós importante tebes tanba bele halo kooperasaun entre universidade iha ASEAN.
“Ensinu superiór importante tebetebes. Ita bele loke no habelar liután ita-nia kooperasaun iha área ensinu superiór, entre universidade no institutu sira iha ASEAN nune’e bele fasilita mobilidade entre estudante, profesór sira, funsionáriu no peskizadór sira,” nia haklaken.
Reitór UNTL hatutan katak presiza tau prioridade ba kestaun tolu importante hanesan seguransa, sosiál-kulturál no ekonomia.
Jornalista : Osória Marques
Editora : Julia Chatarina
