DILI, 25 Juñu 2025 (TATOLI)- Governu halo análize kona-ba progresu Timor-Leste iha prosesu adezaun ba akordu servisu ASEAN nian, liuliu Akordu-Kuadru kona-ba Servisu (AFAS) no Akordu kona-ba Komérsiu Servisu ASEAN (ATISA) nian.
Vise-Ministra ba Asuntu ASEAN, Milena Rangel, hateten durante reuniaun ba da-110 Komité Koordenadora ba Servisu (CCS) nian, ne’ebé hala’o iha Juñu 2025 iha Laos, ASEAN halo avaliasaun ba Kuadru Kompromisu (SoC) Timor-Leste nian, hodi identifika nesesidade atu ajusta subsetór 20 iha Modu 3 (prezensa lokál) Asesu ba Merkadu hodi kumpre kritériu mínimu AFAS nian.
Tuir nia, daudaun ne’e Timor-Leste kumpre ona subsetór 306 husi 326 ne’ebé presiza atu adere ba akordu sira ne’ebé temi ona.
Nune’e Konsellu Ministru fó mandatu ba Vise-Ministra ba Asuntu ASEAN atu hamutuk ho ministériu relevante sira, lidera negosiasaun kona-ba ajustamentu tékniku ba Kuadru Kompromisu, nu’udar pasu fundamentál iha prosesu adezaun plena ba akordu servisu rejionál sira ASEAN nian to’o tinan 2036, tuir kalendáriu ne’ebé estabelese ona ba nasaun sira CLM nian (Cambodia, Laos no Myanmar).
Nia dehan depoizde rona tiha Sekretáriu ASEAN iha Jakarta, nomós Estadu-membru sira kona-ba Timor-Leste nia oferta ba servisu, sira husu para ajusta sasán balun tuir duni sira-nia kritériu mínimu sira.
“Ne’e duni ita akomoda pedidu ida-ne’e, ita lori fali mai, hato’o iha Konsellu Ministru para depois aprova no fó mós mandatu ba tékniku sira, negosiadór sira ba ita-nia postu ekonómiku, para ami bele komesa halo ona negosiasaun ba postu ekonómiku sira ne’ebé reflete no akomoda duni ba ita-nia interese nasionál”, governante hateten iha Palásiu Governu, ohin.
Notísia relevante: KM aprova proposta Timor-Leste nian atu asesu ba beins merkadu ASEAN
Jornalista: Arminda Fonseca
Editora: Maria Auxiliadora
