Prevene raiva, DSMJM husu komunidade suku 18 iha Bobonaru sulan animál
BOBONARU, 08 Jullu 2025 (TATOLI)–Diresaun Servisu Munisipál Jestaun Merkadu (DSMJM) Autoridade Munisípiu Bobonaru, tersa ne’e, halo sosializazaun ba Dekretu-lei Ijiene Orden Públika númeru 33/2008, 17 Agustu, ba líder komunitáriu sira iha Postu Administrativu Bobonaru hodi habelar informasaun urjentimente ba komumidade atu sulan animál liuliu espésie asu nune’e bele prevene tranzmisaun vírus raiva.
Xefe Departamentu DSMJM, Ernesto de Oliveira Barreto, hateten DSMJM urjentimente halo sosializasaun ba dekretu-lei ne’e tanba Munisípiu Bobonaru rejista asu pozitivu raiva tata ema barak no hamate ona ema-na’in rua.
Antigu Administradór Postu Administrativu Bobonaru ne’e haklaken bainhira kazu referidu alastra maka’as liután tempu badak ekipa Task-Forse Autoridade Munisípiu Bobonaru koordena ho PNTL no F-FDTL inklui autoridade lokál sira atu halo operasaun konjunta ba animál ne’ebé husik livre iha espasu publiku no iha suku ho aldeia.
Antigu Prezidente Autoridade Munisípiu Bobonaru ne’e mós afirma durante operasaun la’o, bainhira haki’ak-na’in sira la koopera sei aplika multa.
Notisia Relevante: Komunidade solisita Autoridade Bobonaru halo operasaun ba asu husik livre
“Lei ne’e iha artigu ko’alia kona-ba koima ne’e hateten, ita-nia asu tata ema ida tenke selu $5 bá to’o $500. Ne’e se kanek ki’ik. Karik nia tata ema kanek todan sei selu husi $10 bá to’o $1000. Se mate ne’e liu ida-ne’e,” nia hateten durante halo intervensaun ba atividade ne’ebé realiza iha salaun Administrasaun Postu Bobonaru.
Iha biban ne’e, Xefe Suku Mali-lait, Valdemar Maria Vong de Jesus, prontu sosializa dekretu-lei ne’e atu konxiensializa komunidade sulan animál iha luhan.
Nia rekomenda ba ekipa Task-Forse atu aselera implementasaun atividade operasaun ba animál molok moras ne’e fó perigu ba ema barak nia vida.
Aleinde ne’e, Xefe Suku Oe-leu, Januario Meta-Tae Bragança, rekoñese komunidade maioria husik animál livre tanba laiha luhan no seidauk iha koñesimentu kona-ba lei.
“Sosializasaun ne’e tun bá to’o komunidade nune’e konfiansa komunidade ne’e iha. Se ami mak bá hato’o sira dehan fali xefe suku naran ko’alia de’it,” Januario haktuir.
Tuir dadus husi Departamentu Vijilánsia Epidiomolojia Diresaun Servisu Munisipál Saúde Autoridade Munisípiu Bobonaru hahú husi Janeiru to’o loron 06 Jullu 2025 rejista kazu asu tata ema hamutuk 184 no asu 13 mak konfirmadu pozitivu vírus raiva.
Jornalista: Sergio da Cruz
Editór: Xisto Freitas da Piedade
