VIKEKE, 08 Jullu 2025 (TATOLI)—Servisu Ministériu Agrikultura Peska, Pekuária no Floresta (SMAPPF) liuhusi Departamentu Veterenária Munisípiu Vikeke, preparadu vasina komunidade Vikeke nia asu atu prevene vírus raiva (rabies).
Diretór Servisu MAPPF Munisípiu Vikeke, Olívio Soares Freitas, hateten kona-ba vírus raiva ne’ebé daudaun ne’e invade ona iha Munisípiu Bobonaru no Kovalima, maski Munisípiu Vikeke seidauk rejista kazu raiva, maibé SMAPPF Munisípiu Vikeke preparadu atu vasina asu sira atu prevene vírus referidu.
“Ba vírus raiva ita iha tékniku veterenáriu preparadu hodi vasina asu. Vírus raiva ne’e perigu ba ema-nia vida tanba iha munisípiu balun ne’e asu tata ema mate ona, ne’ebé ita agora atensaun hela,” Olívio ba Tatoli iha Postu Vikeke, tersa ne’e.
Notísia relevante: HNGV rekoñese estoke vasina anti Raiva mamuk
Aleinde ne’e, nia husu komunidade iha Munisípiu Vikeke ne’ebé haki’ak animál, kuandu moras informa ba SMAPPF Vikeke hodi fó tratamentu ba animál sira-ne’ebé moras.
Iha fatin hanesan, Xefe Departamentu Veterenáriu SMAPPF Vikeke, Domingos do Carmo Pinto, reforsa, kona-ba ai-moruk raiva, seidauk distribui stock mai Munisípiu Vikeke, tanba ne’e mak parte veterenária sira seidauk vasina komunidade nia asu.
“Ami hein de’it desizaun husi nasionál. Tanba ita-nia ai-moruk vasina nian seidauk distribui mai munisípiu. Bainhira parte nasionál distribui ona, ami bele atende komunidade nia asu,” nia hato’o.
Domingos dehan, Veterenária Munisípiu Vikeke kontinua halo koordenasaun ho nasionál atu halo prevensaun ba vírus referidu.
Tuir dadus, téknika veterenária SMAPPF Vikeke hamutuk na’in-10 mak daudaun ne’e ativu halo atendimentu ba komunidade nia animál iha Vikeke.
Jornalista: Vitorino Lopez da Costa
Editór: Xisto Freitas da Piedade
