HNGV rekoñese estoke vasina anti Raiva mamuk
DILI, 07 Jullu 2025 (TATOLI)—Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, rekoñese iha Hospitál Nasionál Guido Valadares (HNGV) daudaun ne’e estoke vasina anti Raiva mamuk.
Notísia Relevante: Ministériu tolu forma ekipa konjunta ba prevensaun moras raiva
“Agora daudaun iha HNGV estoke anti Raiva laiha maibé asegura nafatin iha INFPM. Tuir informasaun ne’ebé mak sira fó katak bainhira pedidu emerjénsia tama ne’e sira fornese kedas,” Vidal de Jesus Lopes hateten ba ba jornalista sira, iha HNGV, ohin.
Nia esplika, vasina anti Raiva estoke limitadu tebes ona iha INFPM, tanba INFPM dalabarak distribui vasina sira-ne’e, maibe agora estoke menus ona entaun INFPM rasik hetan kontaktu husi UNDP ho OMS atu apoia.
Nune’e, UNDP aloka ona osan liu husi INFPM sira sei oferese vasina anti Raiva maibé tenke liu husi ajénsia sira, tanba entermu transportasaun no konservasaun kualidade vasina ne’e rasik tenke asegura nia temperatura aviaun nian, entaun vasina sira-ne’e tenke ajuda husi parseiru sira no signifika Governu fó osan mak sira oferese hodi hatama mai.
“Tuir informsaun ne’ebé mak iha katak agora daudaun vasina anti Raiva iha INFPM hamutuk vial vasina 300, ida-ne’e asegura ba situasaun emerjénsia ne’e seidauk distribui ba fasilidade saúde sira seluk. Maibé, bainhira UNDP ho OMS oferese ne’e tama mai mak internalmente INFPM rasik jere atu distribui ba fasilidade saúde sira,” nia esplika.
Atu halo prevensaun ba kazu Raiva mak bainhira asu tata ema ne’e hamoos no fase kedas kanek fatin durante minute 10 no lori kedas pasiente asu tata ne’e ba vasina, atu nune’e prevene sintoma la bele mosu, se lae nia fatalidade ne’e mosu fali 100% labele salva ona.
Entertantu, tuir dadus ne’ebé mak iha katak ema ne’ebé mate tanba pozitivu rRaiva hamutuk na’in-hitu (7) no husi númeru ne’e RAEOA tolu (3), Bobonaru rua (2), Ermera ida (1) no Kovalima ida (1).
Notísia Relevante: INFPM husu apoiu vasina raiva ba OMS
Jornalista : Felicidade Ximenes
Editór : Cancio Ximenes
