DILI, 08 Jullu 2025 (TATOLI)—Timor-Leste Press Union (TLPU) no Uniaun Profisaun Jornalista Timor-Leste (UPJTL, sigla portugés) nia esperansa ba alterasaun lei komunikasaun sosiál ne’ebé daudaun ne’e iha hela faze revizaun.
Notísia Relevante: Editór no Jornalista nia esperansa ba alterasaun lei Komunikasaun Sosiál
Prezidente Timor-Leste Press Union (TLPU), Candido Alves, hateten alterasaun lei komunikasaun sosiál ne’e atu bele define lolooss kona-ba mídia, tanba iha lei komunikasaun nú.5/2014, ne’ebé antes ne’e iha ona la define kona-ba mídia sosiál no plataforma dizitál online.
“Ho ezbosu lei ne’e bele regula ona katak funsaun ida-idak iha mídia nian, tanba lei ida antes ne’e reflete de’it ba mídia konvensionál, entaun ho alterasaun lei komunikasaun sosiál foun bele detallu liután,” Prezidente TLPU ne’e informa ba Agência Tatoli liuhusi telefónika, ohin.
Jornalista senior ne’e dehan, alterasaun ne’e halo lalais di’ak liután para bele regula ona mídia sira, tanba bainhira ema seluk mak foti seluk nia produtu jornalístiku depois tau fali iha ninia obra seluk no bainhira atu halo reklamasaun susar, tanba laiha lei detallu ba ida-ne’e.
“Tanba mídia sosiál ne’e ohin loron ema barak mak uza liuliu aplikasaun facebook ne’e responsabilidade ema ida-idak (pesoál) maibé ida kategória mídia konvemsionál ne’e tama responsabilidade ba redasaun nian,” nia dehan.
Nia esplika, se halo lei ne’e mak koloka ida-idak tuir ninia fatin ne’e di’ak liután, tanba durante ne’e komunidade timor seidauk komprende didi’ak kona-ba mídia sosiál no mídia konvensionál.
Nune’e, Governu tenke iha kooperasaun di’ak hodi halo revizaun ba lei komunikasaun sosiál, nune’e bainhira lei ne’e altera karik katak lei ne’e ema hotu nian, tanba antes enkontru xefe redasaun barak mak la partisipa ne’e hatudu katak ladun iha kooperasaun
Prezidente Uniaun Profisaun Jornalista Timor-Leste, Horacio Babo, dehan lei komunikasaun sosiál ne’ebé prodús ne’e, daudaun ne’e iha hela prosesu revizaun no espera alterasaun lei ida-ne’e bele adapta tuir situasaun reál agora dadaun ne’e.
Tanba, nia dehan, iha lei komunikasaun sosiál ida antes ne’e la akumula plataforma mídia online sira no dalaruma mós lei komunikasaun ida tuan ne’e la update ona ho situasaun agora nian.
“Espera lei komunikasaun ne’e bele akumula mós ho situasaun balun ne’ebé favorese ba jornalista sira no sai benefísiu ba komunidade mídia sira nia profisaun hanesan jornalista ida,”, Prezidente UPJTL ne’e ko’alia.
Nia apela, bainhira lei komunikasaun ne’e altera presiza halo mós sosializasaun ba públiku no halo konsultasaun ho jornalista sira, atu nune’e hetan aprovasaun husi Presidente Repúblika labele sai fali lei ida-ne’ebé la benefísia ba komunidade mídia sira.
“Ita mós sensibilzia ba identidade hotu liuliu entidade Estadu nian atu nune’e labele impede fali servisu jornalista ka komunidade mídia nian bainhira halo kobertura iha terrenu,” nia dehan.
Notísia Relevante: “Alterasaun lei komunikasaun sosiál tenke define interrese hotu-hotu la’ós individu”
Jornalista : Alexandra da Costa
Editór : Cancio Ximenes
