DILI, 08 Jullu 2025 (TATOLI)-Tribunál Rekursu liuhusi akordaun mantein desizaun Tribunál Judisiál Primeira Instánsia Dili hodi deside Estadu liuhusi Ministériu Negósiu Estranjeiru no Kooperasaun (MNEK) tenke indemniza eis-konsúl Timor-Leste ba Sídnei, Luciano Valentim Conceição, ho valór $9.500.
Obrigasaun Estadu ba indemnizasaun ne’e, tanba Luciano Valentim manán keixa hasoru eis-ministra MNEK, Adaljiza Magno, ba faktu ílisitu ne’ebé akontese iha 2021.
“Ha’u hanesan mandatáriu señor Luciano nian, tribunál notifika horiseik no iha desizaun ne’e tranzitada ein-julgada ona, ne’ebé Estadu hanesan Réu iha prosesu ne’e tenke kumpre desizaun hodi selu indemnizaun ba señor Luciano nu’udar autór ho valór $9.500”, Sergio Quintas hatete ba jornalista sira liuhusi konferénsia imprensa ne’ebé halo iha Glory Jeans Kolmera, tersa ne’e.
Nia dehan, Estadu iha obrigasaun indemniza eis-Konsúl Timor-Leste nian ba Sídnei, Luciano Maubere, tanba faktu la provadu katak nia mak troka konta bankaria Konsúl Jerál Sídnei iha Austrália.
Sergio hateten, prosesu ida-ne’e laiha prazu ba selu indemnizaun, tanba ne’e hahú ohin no ba oin prokuradór ne’ebé kaer prosesu ne’e bele solisita ona ba MNEK katak prosesu ida MNEK nu’udar Réu, Tribunál Rekursu deklara katak lakon ona iha prosesu, nune’e iha obrigasaun selu Luciano.
Quintas haktuir, kuandu Estadu la selu nia kliente tuir desizaun tribunál nian, hanesan mandatáriu sei hatama fali prosesu ida ho títulu ezekutivu tuir artigu 766 no 768 husi Kódigu Prosesu Sivil ba tribunál hodi haruka polísia ba edifisiu MNEK hodi halo ezekusaun ba prosesu indemnizaun.
“Ha’u hanesan mandatáriu husu ba Estadu hanesan Réu iha prosesu ne’e atu hatudu boa fé hodi indemniza ha’u nia kliente ne’ebé nu’udar autór ba prosesu, nune’e ha’u labele halo tan asaun ezekutivu”, nia afirma.
Iha fatin hanesan, Luciano Valentim Conceição, apresia ho desizaun ne’e. “Ha’u agradese ba ita-nia tribunál, ba ita-nia seitór justisa ne’ebé halo ona desizaun ne’e”.
Notísia relevante: Tribunál deside Estadu indemniza Luciano Valentim ho osan $9.500
Jornalista : Natalino Costa
Editora : Rita Almeida
