DILI, 05 marsu 2024 (TATOLI)-Kazu Eis-Konsúl Sidney hasoru eis-ministra negósiu estranjeiru kooperasaun (MNEK), Adaljiza Magno liuhosi sentensa Tribunál Judisiál Primeira Instánsia Dili (TJPID) deside Estadu iha obrigasaun tenke naran di’ak ba eis-Konsúl Sidney Luciano Valentim ho osan valór kuantia $9.500.
Tanba durante iha prosesu julgamentu ne’ebé hala’o iha Tribunál Judisiál Primeira Instánsia Dili Juíz Prosesu Edite Palmira haree katak eis-ministra Adaljiza Magno hafo’er Luciano Valentino nia naran, hatuun reputasaun no kredibilidade Luciano nian momentu sei asume kargu hanesan Konsúl Sidney iha 2021.
Kazu entre eis Konsúl Sidney, Luciano Valentim Conceição “Timor Maubere” hasoru Eis-ministra MNEK Adaljiza Magno ne’e akontese iha 2021, bainhira eis governante ne’e halo deklarasau iha públika ne’ebé dún eis Konsúl Sidney Luciano Valentim troka ona nota bankaria Konsúl Timor-Leste iha Sidney, tanba ne’e parte MNEK labele halo transferénsia osan ba nota bankaria Konsúl Timor-Leste iha Sidney.
Ho ida ne’e halo Eis-Konsúl Sidney Luciano Valentim lamenta tanba sente eis-ministra nia deklarsaun ne’e hafo’er nia naran no hamonu nia reputasaun no hamonu nian kredibilidade hanesan diplomata ida ne’ebé reprezenta Estadu Timor-Leste iha mundu internasionál.
Ho nune’e iha loron 4 outubru akompaña hosi nia defeza Defensór Públiku Sergio Quintas deside hatama keixa iha Tribunál Primeira Instánsia Dili ho naran asaun deklarativa de indemnizasaun por faktu ílisitu ne’ebé iha artigu 417 hosi Kódigu Prosesu Sívil.
Hosi kazu ne’e iha 5 marsu 2024 Tribunál Judisiál Primeira Instánsia Dili deside katak Estadu liuhosi Ministériu Negósiu Estranjeiru Kooperasaun (MNEK) iha obrigasaun tenke selu naran di’ak ba eis-Konsúl Sidney Luciano Valentim ho osan valór kuantia $9.500, tanba Adaljiza Magno iha 2021 asume kargu nudar Ministra Negósiu Estrajeiru Kooperasaun (MNEK).
Defeza hosi Autór eis-Konsúl Sidney LucianoValentim, Defesór Públiku Sergio Quintas hteten, hanesan parte Defeza hosi autór (Luciano) simu ona desizaun hosi Tribunál ba kazu eis-Konsúl Luciano Valentim Conceição hasoru eis ministra Adaljiza Magno ba asaun deklarativa de indemnimizasaun por faktu ílisitu.
“Ha’u foin desizaun desizaun Tribunál ba kazu ne’e. Iha desizaun Tribunál nian ne’e konsidera keixa (petisaun ) ne’ebé Luciano Valentim hatama ba Tribunál hasoru eis- Adaljiza Magno ne’e prosidente, Tribunál haree katak aktu ne’ebé mak eis-ministra Adaljiza Magno halo ne’e hafoer dui Luciano Valentim nia naran, hamonu reputasaun no hatúnduni kredivilidade Luciano momentu sei asume kargu Konsúl iha Sidney ho nune’e Tribunál afavór ba keixa ne’ebé autór Luciano Valentim halo no Tribunál kondena ba parte reo (Estadu) tenke indemniza ba autór (Luciano) ho valór osan ho kuantia $9.500,” hateten Sergio Quintas ba jornalista sira iha Tribunál Judisiál Primeira Instánsia Dili,tersa ne’e.
Nia dehan, momentu ne’e parte autór (Luciano) hatama keixa iha Tribunál hasoru reo (Adaljiza Magno) tanba nia momentu ne’e sei asume kargu hanesan Ministra Negósiu Estajeiru no Kooperasaun.
Tanba ne’e mak keixa ne’ebé mak hosi autór Luciano Valentim hatama ne’e hasoru Estadu. Haree ba sirkustansia ida ne’e mak iha kazu ida ne’e Ministériu Negósiu Estranjeiru Kooperasaun mak tenke responsavél indemnimizasaun ho valór osan kuantia $9.500 ne’ebé Tribunál fiksa ona iha nia sentensa.
Sergio Quintas afirma, iha sentensa Tribunál nian ne’e deskreve katak fó loron 30 para parte reo (Estadu) atu rekore buat ruma. Karik la simu desizaun Tribunál bele halo rekursu.
“Kuandu iha loron 30 mak parte reo lakonsidera Tribunál nia sentensa ne’e, entaun ne’e signifika parte reo konkorda ho Tribunál Judisiál Primeira Instánsia nian desizaun no desizaun Tribunál tama ona ba tranzitu em-julgadu no ami hatama kedas asaun ezekutivu mai Tribunál hodi husu Estadu para selu kedan osan ne’ebé Tribunál fiksa ona iha sentensa ho valór $9.500,” nia adianta.
Entratantu bazea ba desizaun Tribunál ne’ebé fikza iha akordaun katak parte reo (Estadu) iha obrigasaun tenke selu indemnizasaun por danos patrimoniál ba ka selu naran di’ak ba autór (Luciano Valentim) ho osan kuantia $7.000.00 no Estadu iha obrigasaun selu ba autór (Luciano) ho danu não patrimoniál ho valór kuantia $2.500,00.
Danu não patrimonial ne’e signifka osan ne’ebé autór (Luciano) momentu sei hanesan Konsúl Jerál iha Sidney bainhira Governu la halo tranferensia osan ba konta bankaria Konsúl Jerál Sidney nia rasik hasai nia osan hodi selu funsionariu Konsúl nian selu eletrisidade no nesesidade seleuk seluk tan nune’e bele garantia funsionamentu Konsúl Jerál iha Sidney.
Tanba ne’e Tribunál deside Estadu tenke selu danu não patrimoniál ho valór kuantia $2.500,00 ba Luciano. Nune’e totál osan ne’ebé Estadu tenke selu danu patrimoniál no ida laos patrimoniál hamutuk $9.500.00.
Jornalista: Natalino Costa
Editór: Rafael Ximenes de A. Belo
